El namysyn qorǵaý — boryshym — Aleksandr Býblık

ASTANA. KAZINFORM — Astanada Devıs kýbogy aıasynda Monakomen matchqa qatysyp jatqan Qazaqstan quramasynyń kóshbasshysy Aleksandr Býblık óz oı-pikirin bildirdi.

Tennısshi qurama úshin oınaýdyń mańyzy erekshe ekendigin atap ótti.

— Men eń aldymen sportshymyn, sondyqtan ózime qolaıly jaǵyn oılaýǵa tıistimin. Degenmen qurama sapynda týrnırge qatysý úshin Nıý-Iorktan Koreıaǵa 20 saǵat ushtym. Óıtkeni men el úshin oınaýǵa tıistimin, bul — meniń boryshym. Men osylaı dep esepteımin jáne mindetim ekendigin túsinemin. Al ATP 250 jarysynda baq synaý — meniń tilegim. Eger ol meniń kesteme saı kelse, qýana qatysamyn. Shynymdy aıtsam, óz elińde oınaý qashanda aýyr. Jankúıerler qoldaýynan qýat alatyndar bar. Biraq men ózimniń úzdik nátıjelerimdi kórermender maǵan qarsy bolǵan kezde kórsettim. Mysaly, Parıjdegi masters týrnıri men Rolan Garrosta solaı boldy, — dedi A.Býblık.

Ol joǵary deńgeıdegi tennısshiniń oıyn kezinde qandaı jaǵdaıǵa da psıhologııalyq jaǵynan daıyn bolýy kerektigin aıtty.

— Adamdar seniń ár qımylyńdy qoldap, qýattasa, bul — jaqsy. Alaıda myqty oıynshy bolsań, muny eskere bermeısiń. Sen óziń týraly, ár soqqy týraly oılaısyń, sebebi ár sát match taǵdyryn sheship ketýi múmkin. Qazaqstandyq jankúıerler aldynda oınaý men úshin — úlken qýanysh, degenmen báribir ózime kóńil aýdarýǵa tyrysamyn, — dep qosty Býblık.

Búgin Qazaqstan men Monako arasyndaǵy match jalǵasady. Alǵashqy kezdesýde juptyq synda Aleksandr Býblık Beıbit Juqaevpen birge Roman Arneodo — Ýgo Nıspen sheberlik baıqasady.
Eske sala keteıik, budan buryn Devıs kýbogynda Aleksandr Býblıktiń qarsylasyn aıqyn basymdylyqpen utqanyn jazǵan edik.

Sondaı-aq Qazaqstan men Monako matchynda tarazy basy teńesti.

Ámir Omarhanov Týnıstegi jarystyń jartylaı fınalyna ótti.