Elimizge zańsyz ákelingen smartfondar qymbattaýy múmkin

ASTANA. KAZINFORM — Tsıfrlyq damý, ınnovatsııalar jáne aeroǵarysh ónerkásibi mınıstrligi Telekommýnıkatsııa komıteti tóraǵasynyń orynbasary Oljas Qabenov elimizge shetelden ákelingen mobıldi qurylǵylardy tirkeý barysymen taǵy bir tanystyrdy.

— Tirkeý protsedýrasy uıaly telefonnyń baǵasyna eshqandaı áser etpeýi kerek. Resmı satylatyn barlyq uıaly telefon qajetti kedendik jáne basqa da salyqty tólep, barlyq rásimnen ótedi, sondyqtan baǵa naryqqa saı belgilengen, — dep túsindirdi Oljas Qabenov vedomstvoda onlaın ótken baspasóz máslıhatynda.

Osy oraıda spıker «aq» tizimde joq qurylǵylardyń elimizdiń aýmaǵynda jumys istemeıtinin aıtyp otyr. 

— Eger zańsyz, «sur» jolmen Qazaqstanǵa ákelingen smartfondar týraly aıtar bolsaq, olardyń baǵasy qymbattaýy múmkin. Eger siz satyp alý kezinde telefondy tekserip, onyń verıfıkatsııalanǵan abonenttik qurylǵylardyń «aq» tiziminde joq ekenin anyqtasańyz, onda ol Qazaqstan aýmaǵynda jumys istemeıdi, — deıdi mınıstrlik ókili.

Eske sala ketsek, jyl basynda elimizde abonenttik qurylǵylardyń «aq», «sur» jáne «qara» tizimi paıda bolatyny týraly habarlaǵan bolatynbyz. 

Aıta keteıik, smartfondardy tirkeýdiń jańa erejesiniń bıyl 24 naýryzǵa deıin satyp alynǵan abonenttik uıaly baılanys qurylǵylaryna esh qatysy bolmaıdy.
Sondaı-aq smartfondardy tirkeýdiń jańa erejesi qurylǵylardyń qymbattaýyna áseri týraly jazǵan edik. 

Májilis depýtaty Qazaqstanǵa zańsyz ákelingen jáne tirkelmegen smartfondardy buǵattaýdy usynǵan edi.