Elimizge shetelden ákelingen ónimderden qaýipti karantındik obektiler anyqtaldy
ASTANA. KAZINFORM - Karantındik fıtosanıtarııalyq baqylaý barysynda QR AShM Agroónerkásiptik keshendegi memlekettik ınspektsııa komıtetiniń memlekettik ınspektorlary ımporttalatyn aýyl sharýashylyǵy ónimderinen karantındik obektilerdi anyqtap, fıtosanıtarııalyq zańnama talaptarynyń buzylǵanyn tirkedi. Bul týraly Aýyl sharýashylyǵy mınıstrligi habarlady.
Atap aıtqanda, Almaty oblysynda Qyrǵyz Respýblıkasynan ákelingen salmaǵy 8 690 kg aısberg salatynan batys gúl trıpsi, al Reseı Federatsııasynan jetkizilgen 840 tonna jumsaq bıdaıdan jataǵan ý kekire anyqtaldy.
Aqmola oblysynda zerthanalyq saraptama nátıjeleri Reseıden ákelingen jalpy kólemi 490 tonna jáne 478,8 tonna bolatyn bıdaıdyń eki leginen jataǵan ý kekireniń, sondaı-aq dalalyq jáne eýropalyq aramsoıaýdyń bar ekenin rastady. Aqtóbe oblysyndaǵy «Álimbet» fıtosanıtarııalyq baqylaý beketinde Reseı Federatsııasynyń Orynbor oblysynan jetkizilgen 114,9 tonna zyǵyr tıelgen tórt avtokólik tekserildi. Zerthanalyq saraptama nátıjesinde ónimnen jataǵan ý kekire anyqtaldy.
Osyndaı karantındik obekt Batys Qazaqstan oblysyndaǵy «Shaǵan» beketinde Reseıden ákelingen 70 tonna azyq-túlik arpasynyń partııasynan da tabyldy. Sonymen qatar Abaı oblysyndaǵy «Baqty» fıtosanıtarııalyq baqylaý beketinde Qazaqstan aýmaǵyna úshinshi elderden alma ákelýge qatysty qoldanystaǵy ýaqytsha tyıymnyń buzylýyna jol berilmedi.
Osyǵan baılanysty Qytaı Halyq Respýblıkasynan ákelinbek bolǵan 1 127 kg alma el aýmaǵyna kirgizilmedi. Anyqtalǵan faktiler boıynsha Qazaqstan Respýblıkasynyń zańnamasyna sáıkes tıisti sharalar qabyldandy.
Importtaýshylarǵa qatysty ákimshilik ister qozǵaldy. Aqtóbe oblysynda tirkelgen quqyq buzýshylyqqa qatysty materıaldar sotqa joldandy. Aqmola oblysynda kásipkerlerge astyqty mehanıkalyq jolmen tazartý jáne tazartý barysynda alynǵan qaldyqtardy keıinnen joıý jóninde mindetti nusqamalar berildi.
Karantındik obektimen zalaldanǵan arpa legi jáne zańnamalyq talaptardy buza otyryp ákelingen alma eksporttaýshy elderge keri qaıtaryldy.
QR Aýyl sharýashylyǵy mınıstrligi elimizdiń fıtosanıtarııalyq qaýipsizdigin qamtamasyz etý, sondaı-aq aýmaǵyna qaýipti karantındik obektilerdiń enýi men taralýyna jol bermeý baǵytyndaǵy jumystardy jalǵastyrady. Karantınge jatqyzylǵan ónimderdi el aýmaǵyna ákelý kezinde fıtosanıtarııalyq talaptardyń saqtalýy ýákiletti organdardyń turaqty baqylaýynda.
Bıyl karantındik fıtosanıtarııalyq baqylaý barysynda 1 377 zań buzý anyqtalǵanyn jazǵan edik.
