Elimizge popýlıster emes, túrli salanyń maıtalmandary qajet — Prezıdent
ASTANA. KAZINFORM — Reformalar samarqaýlyqty kótermeıdi. Bul týraly Qazaqstan Halyq Keńesiniń birinshi sessııasynda Memleket basshysy Qasym-Jomart Toqaev aıtty.
— Azamattardyń memlekettik basqarý úderisine tikeleı qatysý tetikterin qurý — eldi jańǵyrtýdyń bir joly. Dál osy sebepti Qazaqstan Halyq Keńesi quramynyń úshten biri qoǵamdyq birlestikter men kommertsııalyq emes uıymdardyń ókilderinen jasaqtaldy. Bul — transformatsııanyń jańa kezeńi. Sol sebepti júrip ótken jolymyzdy obektıvti túrde taldap, keleshektegi kúrdeli syn-qaterlerdi sheshýdiń jańa tásilderin ázirleýdi talap etedi, — dedi Qasym-Jomart Toqaev.
Prezıdenttiń paıymynsha, elimizge popýlıster nemese mansapqorlar emes, kásibı ortada moıyndalǵan kóshbasshylar men túrli salanyń maıtalmandary, naǵyz patrıottar qajet.
— Kóp jumys atqaryldy. Muny moıyndaý kerek. «Úshinshi sektor» tyń serpin alyp, qoǵamdyq baqylaý tetikteri qalyptasty jáne keri baılanys jolǵa qoıyldy. Alaıda reformalar samarqaýlyqty kótermeıdi. Biz muny jaqynda ótken jaǵdaıdan sabaq alyp, kókeıimizge myqtap túıdik. Ózgerister kezeńindegi qysqa merzimdi kidiristiń ózi turaqtylyqtyń shyrqyn buzyp, aýyr saldarǵa uryndyrýy yqtımal, — dedi Memleket basshysy.
Aıta keteıik, jıyn barysynda Prezıdent Konstıtýtsııa ár adamnyń qolynda júretin, jumys ústelinde turatyn qujat bolýǵa tıis ekenin aıtty.
