Elimizge eńbek mıgranttary negizinen qaı elderden keledi
ASTANA. KAZINFORM – 2024 jylǵy 1 jeltoqsandaǵy jaǵdaı boıynsha jergilikti atqarýshy organdardyń ruqsatymen el aýmaǵynda 13 743 shetel azamaty eńbek etedi.
- Shetel jumys kúshin tartýǵa ruqsattardyń arasynda mynadaı sanattar bar: basshylar men olardyń orynbasarlary úshin 564 ruqsat (birinshi sanat), qurylymdyq bólimshelerdiń basshylary úshin 2 585 ruqsat (ekinshi sanat). Tartylǵan ShJK negizgi bóligi úshinshi (mamandar) jáne tórtinshi (bilikti jumysshylar) sanattarǵa jatady – tıisinshe olar 4 913 jáne 999 adam. Sondaı-aq maýsymdyq jumystarǵa 1 186 adam, al korporatıvtik aýystyrý aıasynda 3 496 adam tartyldy, - delingen Eńbek jáne halyqty áleýmettik qorǵaý mınıstrligi taratqan habarlamada.
Qazirgi ýaqytta elde ShJK paıdalanatyn 1 744 jumys berýshi bar. Olarda 388 myńnan astam Qazaqstan azamaty jumys isteıdi, bul qyzmetkerlerdiń jalpy sanynyń 96,5%-y.
Ekonomıkalyq qyzmet túrleri boıynsha eń kóp jumys isteıtinder qurylys salasynda – 5 390 adam, óńdeý ónerkásibi – 1 455 adam, taý – ken ónerkásibi jáne karerlerdi qazý – 1 355 adam, ákimshilik jáne kómekshi qyzmetter – 1 305 adam, aýyl, orman jáne balyq sharýashylyǵy – 1 237 adam.
Eńbek mıgranttary keletin negizgi elder: Qytaı – 4 881 adam, Ózbekstan – 1 273 adam, Túrkııa – 1 203 adam, Úndistan – 1 095 adam.
Іshki eńbek naryǵyn qorǵaý maqsatynda Eńbek jáne halyqty áleýmettik qorǵaý mınıstrligi jyl saıyn respýblıkaǵa shetel mamandaryn tartýǵa kvota belgileıdi jáne bóledi. 2024 jyly jalpy kvota respýblıkadaǵy jumys kúshiniń sanyna qatysty 0,23% nemese 22 myń mólsherinde belgilendi, osy jyly qarashadan bastap mınıstrdiń buıryǵymen 17,2 myńǵa deıin qysqartyldy.
Eske salsaq, elde 350 myńnan astam eńbek mıgranty tirkelgeni týraly jazǵan bolatynbyz.