Elimizge elektromobıl ákelýge tarıftik jeńildikter taǵy 1 jylǵa uzartylýy múmkin
ASTANA. KAZINFORM — Elimizge elektr kólikterin ákelýge tarıftik jeńildikter taǵy 1 jylǵa uzartylýy múmkin. Bul týraly Májilis depýtattarynyń saýalyna Premer-mınıstr Oljas Bektenovtiń jaýabynda aıtylǵan.
— Qazirgi ýaqytta 7.1.38 tarmaqqa sáıkes, Keden odaǵy komıssııasynyń sheshimi kúshinde. Soǵan oraı bekitilgen tarıf aıasynda elektr kólikterin ákelýge arnalǵan tarıftik jeńildikter beriledi. Atalǵan kvota 2025 jyldyń sońyna deıin kúshinde bolady jáne 2024 jáne 2025 jyldary jyl saıyn 15 myń dana kóleminde belgilengen, — dedi Úkimet basshysy.
Onyń málimetinshe, búginde Eýrazııalyq ekonomıkalyq komıssııa (EEK) keńesi aıasynda
«Elektr qozǵaltqyshy bar kólik quraldarynyń keıbir túrlerine qatysty Keden odaǵy komıssııasynyń jáne EEK keńesiniń keıbir sheshimine ózgerister engizý týraly» EEK keńesi sheshiminiń jobasy talqylanyp jatyr. Atalǵan joba elektr qozǵaltqyshy bar matorly kólik quraldarynyń keıbir túrlerin 2026 jyldyń 31 jeltoqsanyna deıin ákelý úshin kedendik baj salyǵynan bosatýdy qarastyrady.
— EEK keńesiniń qarastyrý jáne tıisti sheshim qabyldaý qorytyndysynda Qazaqstan Respýblıkasynyń ýákiletti organdary bekitilgen tártippen kelisilgen ádister aıasynda áreket etedi, — dedi Oljas Bektenov.
Buǵan deıin Memlekettik kirister komıteti Qazaqstanda elektromobılderdi jeńildikpen ákelýge arnalǵan kvota tolyq paıdalanylǵanyn, endi mundaı kólikterdi ákelý jalpy negizde, barlyq kedendik tólemder men salyqtardy tóleı otyryp júzege asyrylatynyn habarlaǵan edi.