Elimizge belgili óner maıtalmandary Tashkent tórinde kontsert berdi
TAShKENT. KAZINFORM – E.Rahmadıev atyndaǵy Memlekettik akademııalyq fılarmonııasynyń ujymy gastroldik saparmen Ózbekstan astanasyna kelip, kontsert berdi, dep habarlaıdy Kazinform agenttiginiń Tashkenttegi menshikti tilshisi Álıhan Asqar.
«Dostyq jyry» ataýymen ótken kontsertti tamashalaýǵa jınalǵan halyqtyń qarasy qalyń. Kontsertte Aıtqalı Jaıymov, Svetlana Aıtbaeva, Anar Muzdahanova jáne Nurlan Bekenov syndy elimizge belgili mádenıet qaıratkerleri óner kórsetti.
«Baýyrlas eldermen qarym-qatynas tyǵyz bolýy kerek. Túbi bir túrki halyqtarymyz, tıisinshe bizdiń mádenı baılanystarymyz únemi nyǵaıyp otyrýy tıis. Sondyqtan biz bul kontsertti burynnan josparladyq. Tashkent turǵyndary men qonaqtaryna qazaqtyń klassık kompozıtorlarynyń týyndylaryn alyp keldik. Atap aıtqanda, N.Tilendıev, A.Jubanov, M.Tólebaevtyń shyǵarmalary shyrqaldy», - dedi dırıjer, kompozıtor, QR Eńbek sińirgen qaıratkeri Aıtqalı Jaıymov.
Qazaqtyń áni men kúıin saǵynyp, kontsertke jınalǵan kórermenniń qoshemeti erek, ónerge degen qurmeti joǵary.
«Kórermenniń yqylasy men qoshemetinen ónerge degen qurmetti kórdim. Qazaq ónerine, áni men kúıine degen saǵynysh seziledi. Biz áýelden aýyly aralas, qoıy qoralas eldermiz. Bir-birimizdiń jeńisimizge tilekshi, qýanyshymyzǵa ortaqtasyp júrgen qos memlekettiń arasyndaǵy osyndaı joǵary deńgeıdegi qarym-qatynas óner salasynda da kórinis berip otyr», - dedi QR Eńbek sińirgen qaıratkeri Svetlana Aıtbaeva.
E.Rahmadıev atyndaǵy Memlekettik akademııalyq fılarmonııasyndaǵy qazaq orkestriniń basshysy Sabyrjan Seıilhanulynyń aıtýynsha, óner ujymy aldaǵy ýaqytta Ózbekstannyń ózge de óńirlerin aralap, kontsert berýdi josparlap otyr.
«Bizdiń maqsat – eki el arasyndaǵy mádenı baılanystardy tereńdete túsý. Ózbekstan astanasynda ótip jatqan kontsertke fılarmonııa ujymynan 65 adam keldi. Bul is-sharany bastama retinde qarastyryp otyrmyz, aldaǵy ýaqytta Samarqan, Buhara sııaqty qalalarǵa gastroldik saparmen barý josparlanyp otyr», - dep toqtaldy Sabyrjan Seıilhanuly.
Búginde eki el arasyndaǵy mádenı baılanystar nyǵaıyp keledi. Atap aıtqanda, buǵan deıin de qos memlekettiń túrli deńgeıdegi óner ujymdary bir-birine gastroldik saparmen barǵan bolatyn. Osy ilkimdi istiń izin jalǵap, keler jyly Ózbekstannyń memlekettik fılarmonııasy Qazaqstan astanasynda kontsert bermek.
Qosa ketsek, buǵan deıin Memleket basshysy Qasym-Jomart Toqaevtyń Jarlyǵymen Qazaqstan men Ózbekstan arasyndaǵy mádenı qarym-qatynasty nyǵaıtýǵa úles qosqan birqatar tulǵa «Qurmet» jáne «Dostyq» ordenderimen marapattaldy.
