Elimizdiń JOO-larynda 700-ge jýyq oqý baǵdarlamasy jabylady
ASTANA. KAZINFORM — Olardyń mazmuny eskirgen. Bul jóninde QR Ǵylym jáne joǵary bilim mınıstri Saıasat Nurbek málimdedi.
Onyń sózinshe, mınıstrlik enbek.kz platformasy arqyly 73 myńnan astam kásiporyndarǵa saýalnama júrgizgen. Nátıjesinde, aldaǵy birneshe jylda zeınetke shyǵatyn mamandar jáne jańadan kelip jatqan jas qyzmetkerler, ıaǵnı eńbek kúshi jóninde tolyq málimet jınalǵan.
Sonymen birge, suranystaǵy jáne suranystan shyǵyp qalǵan mamandyqtar naqtylanǵan.
— Saýalnama negizinde 8500 oqý baǵdarlamasyn saraptap jatyrmyz. 1-2 aptada bul jumystar aıaqtalady. 700-ge jýyq oqý baǵdarlamasyn jabýǵa týra keledi. Bul, árıne, salada aýyrtpashylyq týǵyzady. Keı rektorlar ne professorlar «25-30 ne 40 jyldan beri oqytyp kele jatqan baǵdarlamamyzdy qalaı bular jabady?!» — deýi múmkin. Biraq olardyń mazmuny eskirgen, sapasy da joq. Tolyq aýdıttiń arqasynda osyny anyqtadyq, — dedi mınıstr.
Bul baǵdarlamalar boıynsha, oqyp jatqan stýdentter oqýyn tolyq aıaqtaıdy. Biraq budan keıin atalǵan mamandyqtarǵa jańa qabyldaý júrgizilmeı, jabylady.
Saıasat Nurbektiń sózinshe, bul jumystar bıyl bastalady.
Aıta keteıik, buǵan deıin elimizde stýdentterge qansha jataqhana orny jetispeıtinin jazǵanbyz.
