Elimizdiń joldarynda 2029 jylǵa deıin 60 jańa servıs nysany salynady
ASTANA. KAZINFORM – Qazaqstan Respýblıkasy Kólik mınıstrligi jergilikti atqarýshy organdarmen birlesip, «PetroRetail» JShS-niń elimiz aýmaǵynda zamanaýı jol boıyndaǵy servıs nysandarynyń jelisin damytýǵa baǵyttalǵan ınvestıtsııalyq jobasyn iske asyrýǵa qoldaý kórsetý jumystaryn jalǵastyryp keledi.
QR Kólik mınıstrligi baspasóz qyzmetiniń habarlaýynsha, ınvestıtsııalyq joba aıasynda 2029 jyldyń sońyna deıin jol boıynda 60 zamanaýı servıs nysanyn salý josparlanyp otyr. Olardyń quramyna avtojanarmaı quıý jáne elektr qýatymen zarıadtaý stantsııalary, qoǵamdyq tamaqtaný oryndary, dúkender, TIR turaqtary jáne qonaqúıler kiredi.
Jobany iske asyrý jol boıyndaǵy servıstiń sapasy men qoljetimdiligin arttyrýǵa, júrgizýshiler men jolaýshylar úshin qolaıly jaǵdaı jasaýǵa, sondaı-aq kólik jáne týrıstik ınfraqurylymdy damytýǵa baǵyttalǵan.
Jobany keńeıtý aıasynda iskerlik belsendiligi joǵary ortalyqtarda, qalalarda jáne týrıstik mańyzy bar lokatsııalarda qonaqúıler salý kózdelgen. Bul negizgi avtomobıl baǵyttarynyń boıynda jáne perspektıvti týrıstik marshrýttarda neǵurlym keshendi ınfraqurylym qalyptastyrýǵa múmkindik beredi.
Búgingi tańda 6 qonaqúı nysanynyń qurylysy aıaqtalyp, paıdalanýǵa berildi.
Joba aıasyndaǵy alǵashqy qonaqúıler 2025 jylǵy 17 qyrkúıekte Jambyl oblysynyń Merki aýdanynda jáne 2025 jylǵy 25 qarashada Qyzylorda oblysynyń Aral qalasynda paıdalanýǵa berildi. Joba aıasynda sońǵy paıdalanýǵa berilgen nysan – Qaraǵandy oblysynyń Qarqaraly qalasyndaǵy qonaqúı. Ol 2026 jylǵy 15 maýsymda jumysyn bastady.
Osylaısha, jol boıyndaǵy servıs jelisin damytý dástúrli avtojanarmaı quıý keshenderimen ǵana shektelmeı, jol qozǵalysyna qatysýshylarǵa arnalǵan tolyqqandy ınfraqurylymdy qalyptastyrýǵa baǵyt alýda. Qonaqúılerdiń, tamaqtaný oryndarynyń, dúkenderdiń, turaqtar men elektr zarıadtaý stantsııalarynyń salynýy qaýipsiz ári jaıly saparǵa qajetti jaǵdaı jasaýǵa, sondaı-aq óńirlerdegi iskerlik jáne týrıstik belsendilikti arttyrýǵa yqpal etedi.
-Investıtsııalyq jobany iske asyrý jumystary jalǵasýda. 2029 jyldyń sońyna deıin qalǵan nysandardy kólik qozǵalysyna degen suranysty, týrıstik áleýetti jáne tıisti aýmaqtardyń áleýmettik-ekonomıkalyq mańyzyn eskere otyryp, kezeń-kezeńimen salý josparlanyp otyr,-delingen habarlamada.
Aıta keteıik, búgingi tańda respýblıka joldarynda 1 400-den astam servıs nysany jumys isteıdi.
