Elimizdiń zeınetaqy júıesi ózgeriske ushyraı ma — Eńbek mınıstrliginiń jaýaby
ASTANA. KAZINFORM — Eńbek jáne halyqty áleýmettik qorǵaý mınıstrligi elimizdiń zeınetaqy júıesinde oryn alýy múmkin ózgeristerge qatysty pikir bildirdi.
Agenttiktiń resmı saýalyna jaýap bergen vedomstvo zeınetaqy júıesinde ózgerister oryn alýy múmkin ekendigin joqqa shyǵarmady. Biraq, dál qazirgi ýaqytta júıeni reformalaý boıynsha naqty sheshim qabyldanbaǵanyn, al barlyq usynys keshendi túrde qarastyrylyp jatqanyn atap ótti.
Mınıstrliktiń túsindirýinshe, elimizdiń qoldanystaǵy zeınetaqy júıesi úsh komponentten — yntymaqty, bazalyq jáne jınaqtaýshy zeınetaqydan turady. Olar túri qaǵıdattar boıynsha qalyptasady.
— yntymaqty zeınetaqy elimiz jınaqtaýshy modelge kóshken 1998 jyldyń 1 qańtaryna deıingi ótkerilgen eńbek ótilin eskere otyryp taǵaıyndalady;
— bazalyq zeınetaqy zeınet jasyna jetken barlyq azamatqa beriledi jáne zeınetaqy júıesine qatysýynyń jalpy ótiline baılanysty bolady;
— jınaqtaýshy zeınetaqy mindetti, mindetti kásiptik jáne erikti zeınetaqy jarnasy esebinen qalyptastyrylady jáne jınaq kólemine táýeldi.
Sondaı-aq vedomstvo zeınetaqy júıesin odan ary damytý máselesi qarjy retteýshisimen jáne Biryńǵaı jınaqtaýshy zeınetaqy qorymen birge halyqaralyq tájirıbeni eskere otyryp pysyqtalatynyn atap ótti. Bul rette júıeniń uzaqmerzimdi turaqtylyǵyn qamtamasyz etý basty mindetterdiń biri bolmaq.
Eńbek mınıstrligi senator Amangeldi Nuǵmanovtyń jasqa baılanysty zeınetaqy taǵaıyndaý úlgisinen eńbek ótiline negizdelgen júıege kezeń-kezeńimen kóshý usynysy da qarastyrylatynyn atap ótti.
