Elimizdiń vagon parki 100%-ǵa jańartylady
ASTANA. KAZINFORM — № 145/146 «Astana-Omby» halyqaralyq baǵytyna 8 jańa jolaýshylar vagony paıdalanýǵa berildi. 3 kýpe jáne 8 platskart vagon 300-den astam jolaýshyny tasymaldaıdy.
Bul vagondar — otandyq ónim.
Petropavlda qurastyrylǵan olar kondıtsıoner, bıodárethana, beınebaqylaý kameralary t. b. zamanaýı quraldarmen qamtamasyz etilgen.
«Jolaýshylar tasymaly» AQ Bas dırektory Dııar Núsipqojanovtyń sózinshe, sońǵy 4 jylda Petropavldan osyndaı 436 vagon jetkizilgen.
Olar «Pavlodar-Túrkistan», «Pavlodar-Almaty», «Qyzylorda-Semeı», «Almaty-Saratov», «Almaty-Novosibir» jáne «Mańǵystaý-Atyraý» baǵyttarynda jolaýshy tasymaldap júr.
— Memleket basshysynyń tapsyrmasyna sáıkes jolaýshylar vagondary parkin jańartý jumystary júıeli túrde júrgizilip keledi. Bul — kompanııanyń strategııalyq basym baǵyty. Aldaǵy eki jylda taǵy 131 jańa vagon alamyz. 2030 jylǵa qaraı elimizdiń vagon parki 100%-ǵa jańartylady, — dedi D. Núsipqojanov.
Aıta keteıik, jolǵa shyqqan jańa vagondardy Railways Systems KZ holdıngi qurastyrǵan.
— Jylyna 150-250 shamasynda jolaýshylar vagonyn qurastyra alamyz. Olardyń jaramdylyq merzimi — 40 jylǵa deıin. Osy aralyqta tozsa, álbette, jóndeýden ótkizýge bolady. Odan bólek júk vagondary, tsısternalar t. b. ónimderdi shyǵaramyz. Óndiriske qajetti shıkizattyń keıbirin elimizden, keıbirin Reseı, Belarýs tárizdi memleketterden alamyz, — deıdi kompanııanyń kommertsııalyq dırektory Artem Pavlınger.
Eske salaıyq, buǵan deıin sáýirde Stadler kompanııasynyń alǵashqy vagondary qatynaı bastaıtynyn jazǵanbyz.