Elimizdiń úzdik ustazdary mektepterge tálimgerlik etedi

ASTANA. KAZINFORM — Oqý-aǵartý mınıstri Ǵanı Beısembaev elimizdiń úzdik pedagogterimen, ardager ustazdarmen onlaın formatta kezdesý ótkizdi. Ashyq dıalog alańyna aınalǵan bul jıyn qazirgi bilim berý júıesindegi jáne qoǵamdaǵy muǵalimniń rólin talqylaýǵa arnaldy.

Kezdesýge elimizdiń barlyq óńirinen 100-ge jýyq pedagog qatysty. Olardyń arasynda «Qazaqstannyń Eńbek Eri», «Qazaqstannyń eńbek sińirgen ustazy» ataqtaryna ıe ustazdar da bar. Búginde bilim berý salasynda 5 «Eńbek Eri» men 74 «Qazaqstannyń eńbek sińirgen ustazy» eńbek etip jatyr. Sonymen qatar jyl saıyn ótkiziletin «Úzdik pedagog» respýblıkalyq baıqaýynyń 700-den astam jeńimpazy bar.

Qazaqstan pedagog mártebesin kóterý maqsatynda túrli memlekettik qarjylyq qoldaý tetikterin engizgen sanaýly elderdiń biri. Memlekettik marapat ıegerleri, úzdik pedagogter jáne shákirti halyqaralyq olımpıadalarda úzdik nátıje kórsetken muǵalimderge 1000 AEK kóleminde syıaqy qarastyrylǵan.

— Memleket basshysy ustazdyń rólin qoǵamnyń basty keıipkeri retinde aıqyndap berdi. Pedagogtiń eńbegi laıyqty baǵalanyp, ony qoldaý — memlekettiń basym baǵyttarynyń birine aınaldy. Endigi maqsat — osy ıgi bastamalardy jalǵastyryp, muǵalimder arasynda aǵartýshylyq pen zııalylyq sabaqtastyǵyn saqtaý. Memleket marapatyna ıe bolǵan ustazdar ulttyń maqtanyshyna aınalýy kerek. Biz olardy alty alashtyń tórine shyǵarý arqyly búkil pedagogterge ustaz eńbeginiń laıyqty baǵalanatynyn kórsetip, jetistikke jetýge yntalandyramyz, — dedi Ǵanı Beısembaev.

Jıyn barysynda Qazaqstannyń Eńbek Erleri Gúljanar Nurpeıisova, Alma Shúkijanova, «Qazaqstannyń eńbek sińirgen ustazy» Naǵısha Esbosyn jáne «Eńbek ardageri» Orynsha Qarabalına sóz sóılep, óz tájirıbelerimen bólisti.

— Meniń 54 jyldyq ǵumyrym mektep qabyrǵasynda ótti. Memleket basshysynyń ustazǵa degen qamqorlyǵy — bul bizge artylǵan senim men jaýapkershilik. Ustaz úshin eń úlken marapat — shákirtiniń jetistigi. Sebebi ustaz bolý — tek bilim berý emes, el bolashaǵyn tárbıeleý, — deıdi 93 jastaǵy ardager ustaz Orynsha Qarabalına.

Kezdesý sońynda mınıstr bilim basqarmalaryna úzdik ustazdardy mektepterge tálimger retinde tartýdy tapsyrdy. Sondaı-aq, jas muǵalimderge baǵyt-baǵdar berý maqsatynda tájirıbe almasý alańdaryn uıymdastyrý qajettigin aıtty.

Aıta keteıik, qazirgi tańda mınıstrliktiń bastamasymen bilim berý uıymdarynda «Qazaqstannyń Eńbek eri» jáne «Qazaqstannyń eńbek sińirgen ustazy» atanǵan pedagogterdiń fotogalereıalary ashylyp jatyr.

Eske salsaq pedagog kadrlar qajettigin boljaý ádistemesi qoldanysqa engiziledi.