Elimizdiń úzdik statsıonarlary men emhanalary anyqtaldy
ASTANA.KAZINFORM – Beıbitshilik jáne kelisim saraıynda Medıtsına qyzmetkeri kúnine arnalǵan saltanatty is-shara sheńberinde medıtsınalyq uıymdardyń arasyndaǵy respýblıkalyq konkýrstyń jeńimpazdary jarııalandy, dep habarlaıdy QR Densaýlyq saqtaý mınıtsrliginiń baspasóz qyzmeti.
Konkýrs jyl saıyn medıtsınalyq kómektiń sapasy, basqarý tıimdiligi, zamanaýı tehnologııalardy engizý deńgeıi jáne patsıentterdiń qajettilikterine baǵdarlanýy boıynsha joǵary nátıjeler kórsetken medıtsınalyq uıymdardy anyqtaıdy.
2025 jyldyń qorytyndysy boıynsha «Úzdik emhana» nomınatsııasynyń jeńimpazy Almaty qalasyndaǵy №17 qalalyq emhana boldy.
Aıgúl Esentaevnanyń basshylyǵyndaǵy medıtsınalyq uıym medıtsınalyq-sanıtarııalyq alǵashqy kómekti damytý, profılaktıkalyq baǵdarlamalardy iske asyrý jáne patsıentterge qyzmet kórsetýdiń zamanaýı tásilderin engizý arqyly elimizdiń jetekshi emhanalarynyń biri retinde tanyldy.
«Úzdik statsıonar» nomınatsııasynda Almaty qalasyndaǵy Qalalyq jedel shuǵyl kómek kórsetý aýrýhanasy jeńimpaz atandy. Uıym atynan Erkin Bolatuly Nurlyhanov qatysty. Búginde bul aýrýhana jyl saıyn myńdaǵan patsıentke shuǵyl jáne mamandandyrylǵan kómek kórsetetin elimizdegi eń iri kópbeıindi medıtsınalyq ortalyqtardyń biri bolyp sanalady.
«Úzdik jastar densaýlyq ortalyǵy» ataǵy Semeı qalasyndaǵy №2 emhana janynan qurylǵan «Jas Asyl» jastar densaýlyq ortalyǵy ortalyǵyna berildi. Gúlnar Aıtmuhanqyzy Sháripovanyń basshylyǵyndaǵy ortalyq jastar arasynda reprodýktıvtik densaýlyqty saqtaý, aýrýlardyń aldyn alý jáne salaýatty ómir saltyn qalyptastyrý baǵytyndaǵy baǵdarlamalardy belsendi júzege asyrýda.
«Úzdik jedel medıtsınalyq járdem stantsııasy» nomınatsııasynyń jeńimpazy bolyp Túrkistan oblystyq jedel medıtsınalyq járdem stantsııasy tanyldy. Uıymnyń atynan Baqytjan Myrzageldınov qatysty. Qyzmet ujymy óńir turǵyndaryna táýlik boıy shuǵyl medıtsınalyq kómek kórsetip, jedeldik pen medıtsınalyq qyzmetterdiń qoljetimdiligi boıynsha joǵary kórsetkishterge qol jetkizip keledi.
-Búgin biz tek jekelegen mamandardy ǵana emes, sonymen qatar medıtsınalyq kómektiń joǵary sapa standarttaryn qalyptastyryp otyrǵan medıtsınalyq uıymdardy da qurmetteımiz. Árbir jetistiktiń artynda kásibı ujymdardyń eńbegi, zamanaýı jumys tásilderi jáne myńdaǵan medıtsına qyzmetkerleriniń kúndelikti qajyrly eńbegi tur, – dep atap ótti Qazaqstan Respýblıkasynyń Densaýlyq saqtaý mınıstri Aqmaral Álnazarova.
Densaýlyq saqtaý mınıstrliginde básekeli ortany damytý, úzdik praktıkalardy engizý jáne tabysty medıtsınalyq uıymdardyń tájirıbesin taratý densaýlyq saqtaý júıesin odan ári jańǵyrtýdyń mańyzdy baǵyttarynyń biri bolyp qala beretinin atap ótti.
Marapattaý rásimi Medıtsına qyzmetkeri kúnine arnalǵan merekelik is-sharalardyń bir bóligi boldy. Bul kásibı mereke jyl saıyn elimizdiń barlyq óńirlerinen kelgen medıtsına qaýymdastyǵy ókilderin biriktirip, olardyń ult densaýlyǵyn saqtaýǵa qosqan úlesin moıyndaýdyń aıqyn kórinisine aınalyp otyr.
Aıta keteıik, Prezıdent bir top medıtsına qyzmetkerine memlekettik nagradalar tapsyrdy.
