Elimizdiń úsh óńirinde lańkestikke qarsy oqý-jattyǵý ótip jatyr
ASTANA. KAZINFORM – Qazaqstannyń terrorızmge qarsy ortalyǵy atalǵan óńir turǵyndaryn sabyr saqtap, úreıge boı aldyrmaýǵa shaqyrdy.
«29 sáýir kúni Taraz qalasynyń aýmaǵynda terrorızmge qarsy Jambyl oblystyq jedel shtabymen «Taraz-Antıterror-2024» oqý-jattyǵýy ótkizilýde. Atalǵan is-sharanyń maqsaty - quqyq qorǵaý jáne arnaıy organdardyń kúshteri men quraldarynyń terrorıstik sıpattaǵy túrli qaýip-qaterge qarsy turý deńgeıin tekserý», - delingen resmı aqparatta.
Lańkesttikke qarsy ortalyq qala turǵyndary men qonaqtary júrgizilip jatqan oqý is-sharalaryna, avtokólik pen halyq qozǵalysynyń yqtımal ýaqytsha shekteýlerine túsinistikpen qarap, qaýipsizdik sharalaryn saqtaýǵa jáne memlekettik organdar qyzmetkerleriniń zańdy talaptaryn oryndaýǵa shaqyrady.
Sonymen qatar búgin saǵat 10:00 – 14:00 aralyǵynda Nura kentinde KMM «Nura» stadıonynda (Ábdirov kóshesi, 55) terrorızm aktilerine jedel áreket etý sheńberinde oqý-jattyǵý ótkizip jatyr. Atalǵan obekti aınalasynda shekteý qoıylǵan.
Osyǵan oraı zamattardy túsinýshilikpen qaraýdy, sabyrlyq saqtaýdy, úreıge boı aldyrmaýǵa jáne sharaǵa qatysatyn memlekettik organdar qyzmetkerleriniń zańdy talaptaryn oryndaýdy jáne resmı BAQ aqparattaryna ǵana sený suralady.
Odan bólek, búgin jáne erteń (29-30 sáýir) Jezqazǵan qalasynda terrorızmge qarsy kúres jónindegi Ulytaý oblystyq jedel shtabymen terrorızmge qarsy oqý-jattyǵý ótkizýi josparlanýda.
Terrorızmge qarsy oqý-jattyǵýdyń maqsaty – tótenshe jaǵdaılardy joıý jáne shartty terrorızm aktisin jolyn kesý boıynsha quqyq qorǵaý jáne arnaıy memlekettik organdardyń kúshteri men quraldarynyń praktıkalyq daǵdylaryn damytý.
Ótkiziletin is-sharaǵa baılanysty Jezqazǵan qalasyndaǵy kóshelerinde kólik qozǵalysyna shekteý qoıylatyń máselesi qarastyrylǵan. Turǵyndardan dúrbeleńge jol bermeý jáne tek resmı aqparattar kózine sený kerektigi eskertildi.
