Elimizdiń úsh qalasynda aýa sapasy nasharlaıdy

ASTANA. KAZINFORM – «Qazgıdromet» RMK búgin, 15 qazan kúni Aqtaý, Almaty, Óskemen qalalarynda qolaısyz aýa raıy kútiletinin habarlady.

Sınoptıkterdiń málimetinshe, 15 qazanda Aqtaý, Almaty jáne Óskemen qalalarynda qolaısyz meteojaǵdaılar (QMJ) bolatyny boljanyp otyr.

Qolaısyz meteorologııalyq jaǵdaılar (QMJ) – bul zııandy (lastaýshy) zattardyń atmosferanyń jerge jaqyn qabatynda jınalýyna yqpal etetin qysqa merzimdi meteorologııalyq faktorlardyń (tynysh aýa raıy, álsiz jel, tuman, ınversııa) úılesýi. QMJ kezinde eldi mekenderdegi aýa sapasynyń nasharlaýy múmkin, bul halyqtyń densaýlyǵyna keri áser etýi yqtımal.

Atmosferalyq aýanyń lastaný deńgeıiniń qalyptasýyna áser etetin mańyzdy faktorlardyń biri – sınoptıkalyq jaǵdaıdyń boljamy (jel, jaýyn-shashyn, ylǵaldylyq, aýa temperatýrasy).

Buǵan deıin aldaǵy kúnderi elimizdiń biraz óńirinde aýa raıyna soltústik antıtsıklon áser etetinin jazǵanbyz.