Elimizdiń túrmelerindegi sottalǵandardyń qanshasy jumyspen qamtylǵan
ASTANA. KAZINFORM – QR Іshki ister mınıstrligi Qylmystyq atqarý júıesi komıteti resmı saýalymyzǵa joldaǵan jaýabynda elimizdiń abaqtylaryndaǵy sottalǵandardyń qanshasy jumys istep jatqanyn málimdedi.
– Qazaqstan Respýblıkasynyń qylmystyq-atqarý júıesi mekemelerinde búgingi tańda 30 myńnan astam adam jazasyn ótep jatyr. Olardyń 2 myńnan astamy – áıelder, shamamen 70-i – kámeletke tolmaǵandar, – delingen jaýapta.
Sonymen qatar, vedomstvo ár adamnyń eńbek etýge, qyzmet túri men kásibin erkin tańdaýǵa quqyǵy bar ekenin atap ótti.
– Sottalǵandardy jumysqa ornalastyrý sottalǵan adamnyń resmı ótinish berýi negizinde eńbek shartyn jasasý arqyly júzege asyrylady. Qazirgi ýaqytta shamamen 21 myń adam resmı túrde jumysqa ornalasqan, bul kórsetkish jalpy sottalǵandar sanynyń 65%-ynan asady, – delingen habarlamada.
Aıta keteıik, buǵan deıin qyzylordalyq túrmedegi tanysyna esirtki alyp ótpek bolǵanyn jazǵanbyz.
