Elimizdiń týrıstik áleýetin tanytatyn jarnamalyq naýqanǵa qansha qarjy bólindi
ASTANA. KAZINFORM – Týrızm jáne sport mınıstrligi elimizdiń týrıstik áleýetin sheteldikterge tanytatyn jarnamalyq naýqanǵa bıyl qansha qarajat bólingenin atady.
«Jylda uıymdastyrylatyn týrızmdi oflaın ilgeriletý maqsatynda halyqaralyq týrıstik kórmeler, naryq qatysýshylarynyń ókilderi arasynda B2B kezdesýler uıymdastyrylady. Sondaı-aq áýe kompanııalarmen, halyqaralyq týrıstik qaýymdastyqtarmen jáne jergilikti atqarýshy organdarmen áriptestikte Qazaqstannyń týrıstik áleýetimen tanystyrý úshin aqparattyq jáne baspasóz týrlary ótkiziledi», - dep atap ótti mınıstrlikten agenttiktiń resmı saýalyna oraı.
Vedomstvonyń atap ótýinshe, Qazaqstannyń týrıstik áleýetin ilgeriletý maqsatynda iri medıa alańdar men áleýmettik jelilerde túrli jarnamalyq naýqandar ótkizilip júr.
«Kazakh Tourism» Ulttyq kompanııasy aktsıonerlik qoǵamynyń halyqaralyq jáne ishki naryqtarda týrızmdi ilgeriletýge arnalǵan bıýdjeti 2022 jyly - 520 905 myń, 2023 jyly - 565 488 myń jáne 2024 jyly 400 049 myń teńgeni qurady. Júrgizilip jatqan jumys týrıstik aǵynnyń artýyna úlken úles qosyp otyr. 2023 jyly elge 9,2 mln sheteldik azamat keldi. Bul 2022 jylǵy kórsetkishten 2 ese (4,7 mln adam) kóp. Marketıngtik naýqandar belsendi júrgizilgen elderdiń týrısteri arasynda aıtarlyqtaı ósim baıqalady», - dedi mınıstrlikten.
