Elimizdiń tórt óńirine sý tasqyny men qar kóshkini qaýpi tónip tur
ASTANA. KAZINFORM – Kúnniń jylynýy men jaýyn-shashyn Qazaqstannyń birqatar óńirinde sý basý men qar kóshkini qaýpin kúsheıtip otyr, dep habarlaıdy «Qazgıdromet» RMK.
Jambyl oblysy
5–7 sáýir kúnderi Jambyl oblysynyń taýly jáne taý bókterindegi aýdandarynda qatty jańbyr jaýýy yqtımal, soǵan baılanysty betkeılik aǵyn qalyptasyp, ózenderdegi sý deńgeıi kóteriledi dep kútiledi.
Sý deńgeıi qaýipti mejeden asqan jaǵdaıda ózen jaıylmalarynda ornalasqan eldi mekenderdi, sharýashylyq qurylystardy jáne jergilikti mańyzy bar joldardy sý basý qaýpi saqtalady.
Qostanaı oblysy
4–7 sáýir aralyǵynda oblys aýmaǵynda jańbyr túrindegi jaýyn-shashyn, keı jerlerde qatty jaýyn (oblystyń ońtústik-batysy, batysy jáne soltústik-batysy) kútiledi.
Osyǵan baılanysty sý mólsheriniń artýy, qarqyndy jerústi aǵynynyń qalyptasýy jáne qaýipti gıdrologııalyq qubylystardyń damýy boljanyp otyr. Atap aıtqanda, aýlalardy jáne sharýashylyq nysandaryn sý basý, jergilikti mańyzy bar avtojoldardyń keı ýchaskelerinen sýdyń asýy, sondaı-aq oıpań jerlerde sý jınalýy múmkin.
Almaty qalasy jáne Almaty oblysy
6–10 sáýir aralyǵynda qar jamylǵysynyń qalyń bolýyna jáne jylymyq aıasynda jaýyn-shashyn kútilýine baılanysty Úlken Almaty jáne Kishi Almaty ózenderi alaptarynda qar kóshkini qaýpi saqtalady.
Mamandar yqtımal kóshkindi qozdyryp almaý úshin qar basqan betkeılerge shyqpaýǵa keńes beredi. Taýly aımaqtarda asa saq bolǵan jón.
Aqmola oblysy
6–8 sáýir aralyǵynda aýa temperatýrasynyń oń kórsetkishte saqtalýyna baılanysty (kúndiz +18…+23°C, túnde +4…+9°C) oblystyń ońtústik jáne ortalyq bólikterinde ózenderdiń muzy tolyq sógilip, seń júredi dep kútiledi.
Osyǵan baılanysty ózenderdegi sý deńgeıi kóterilip, qaýipti mejeden asýy múmkin. Sonyń saldarynan erigen qar sýy avtojoldardy, eldi mekenderdi, turǵyn úıler men sharýashylyq qurylystardy basýy yqtımal.
Eske sala keteıik, 6 sáýirge qaraǵan túni Aqmola oblysynda «Shoptykól» bógeti buzylyp, jedel shtab quryldy.
Sonymen qatar Astana – Qorǵaljyn respýblıkalyq avtojolynyń 75-shaqyrymyndaǵy ýchaskeni sý basýdan aman alyp qalý múmkin boldy.
Qazirgi ýaqytta Tótenshe jaǵdaılar mınıstrligi, jergilikti atqarýshy organdar jáne turǵyndar erigen qar sýyn dala aımaǵyna burý úshin bóget deńgeıin kóterý jumystaryn júrgizip jatyr.