Elimizdiń tórt oblysynda 3 gradýsqa deıin úsik júredi — Qazgıdromet

ASTANA. KAZINFORM — «Qazgıdromet» RMK-sy mamyrdyń 11-i kúngi kún raıy boljamyn jarııalady.

Kásiporynnyń boljamyna qaraǵanda, búgin atmosferalyq frontaldy bólikterdiń áserinen elimizdiń basym bóliginde kún qubylmaly bolady. Eldiń basym bóliginde naızaǵaı oınap, jańbyr jaýady. Ońtústik, ońtústik-shyǵys, shyǵysta qatty jańbyr, burshaq jaýady.

Respýblıkamyzdyń batysy, soltústik-batysy, soltústiginde antıtsıklon jotasynyń áserinen kún jaýyn-shashynsyz bolady. Respýblıka boıynsha jel kúsheıip, ońtústiginde, ońtústik-shyǵysy, shyǵysynda daýyl turady, batysy, soltústik-batysynda túnde jáne tańerteń tuman túsedi.

Túnde Batys Qazaqstan oblysynyń soltústiginde, shyǵysynda, Aqtóbe oblysynyń soltústiginde, Qostanaı oblysynyń batysynda, shyǵysynda, Aqmola oblysynyń batysynda, ońtústiginde, Soltústik Qazaqstan oblysynyń ońtústiginde 1-3 gradýs úsik júredi.

Qaraǵandy oblysynyńbatysynda, ońtústiginde, Ulytaý oblysynyń ortalyǵynda, Abaı, Aqtóbe oblystarynyń ońtústiginde, Batys Qazaqstan oblysynyń ońtústiginde, ortalyǵynda, Qyzylorda oblysynyń batysynda, ortalyǵynda órt qaýipi saqtalady, Atyraý oblysynyń batysynda da órt qaýipi saqtalady. Túrkistan oblysynyń shóldi aýdandarynda tótenshe órt qaýipi saqtalady.