Elimizdiń TMD memleketterimen jalpy taýar aınalymy $37,3 mlrd-ty qurady
ASTANA. KAZINFORM — Premer-mınıstr Oljas Bektenov Mınsk qalasynda (Belarýs Respýblıkasy) Táýelsiz Memleketter Dostastyǵy uıymyna múshe elderdiń úkimetteri basshylary keńesiniń shaǵyn jáne keńeıtilgen quramdaǵy otyrystaryna qatysty, dep habarlaıdy Úkimettiń baspasóz qyzmeti.
Jıynǵa Ázerbaıjan Respýblıkasynyń Premer-mınıstri Álı Idaıat oǵly Asadov, Belarýs Respýblıkasynyń Premer-mınıstri Aleksandr Týrchın, Qyrǵyzstan Respýblıkasy Mınıstrler kabınetiniń tóraǵasy – Prezıdent Ákimshiliginiń basshysy Adylbek Kasymalıev, Reseı Federatsııasy Úkimetiniń tóraǵasy Mıhaıl Mıshýstın, Tájikstan Premer-mınıstri – TMD uıymyna múshe elderdiń úkimetteri basshylary keńesiniń tóraǵasy Kohır Rasýlzoda, Ózbekstan Respýblıkasynyń Premer-mınıstri Abdýlla Arıpov, Túrikmenstan Mınıstrler kabıneti tóraǵasynyń orynbasary Hodjamyrat Geldymyradov, TMD Bas hatshysy Sergeı Lebedev bardy, al Armenııa Respýblıkasynyń vıtse-premeri Mger Grıgorıan beınekonferentsııa baılanysy arqyly qatysty.
Shaǵyn formatta delegatsııa basshylary ǵylymı-tehnologııalyq saladaǵy yntymaqtastyq pen ekonomıkalyq ózara is-qımyldyń ózekti máseleleri týraly pikir almasty.
Qazaqstan Premer-mınıstri óz sózinde TMD yntymaqtastyq pen birlesken ózara tıimdi sheshimder úshin senimdi alań bolyp qala beretinin atap ótti. Dostastyq elderiniń JІÓ-degi jıyntyq kólemi jyl saıyn orta eseppen 4,5%-ǵa ósip otyr. Bes jyl ishinde ishki saýda 40%-ǵa artty. Ótken jyly elimizdiń TMD memleketterimen jalpy taýar aınalymy $37,3 mlrd-ty qurady, sonyń ishinde qyzmetter saýdasynyń kólemi 9,4%-ǵa artyp, $4,3 mlrd-qa jetti. Turaqty ósý jáne básekege qabilettilikti arttyrý maqsatynda ekonomıkalyq ózara is-qımyldy odan ári nyǵaıta túsý mańyzdy. Bul rette múshe memleketterdiń bırjalyq saýda tetikterin jetildirý boıynsha júrgizip jatqan keshendi jumysy iskerlik belsendilikti yntalandyrýǵa qosymsha serpin beredi. Ekonomıkanyń qarqyndy ósýin qamtamasyz etý úshin tsıfrlyq transformatsııany arttyrý jáne jasandy ıntellektini engizý salasyndaǵy yntymaqtastyqqa basa nazar aýdarylyp otyr.
— Prezıdent Qasym-Jomart Toqaev óziniń halyqqa Joldaýynda Qazaqstannyń tolyqqandy tsıfrlyq elge aınalýyn taıaýdaǵy úsh jyldyń strategııalyq basymdyǵy retinde aıqyndap berdi. Biz memlekettik basqarýdyń barlyq salasyn qamtıtyn tsıfrlyq kún tártibin qarqyndy túrde damytyp jatyrmyz. Bul túrli áleýmettik máseleni jáne azamattardyń kúndelikti ómiriniń kóptegen aspektisin sheshýge múmkindik beredi. Biz otandyq tsıfrlyq ónimderdi eksporttaýǵa erekshe nazar aýdaramyz. Qazaqstan jınaqtaǵan tájirıbesin sheteldik seriktesterimen keńinen bólisip keledi, Dostastyq boıynsha áriptesterimen de osy baǵyttaǵy yntymaqtastyqty damytýǵa daıyn, — dep atap ótti Oljas Bektenov.
Osyǵan deıin Qanat Bozymbaev Alatau City jobasynyń damý barysymen tanysqany habarlandy.