Elimizdiń sý qoımalarynda jaǵdaı birqalypty

ASTANA. KAZINFORM — Sý resýrstary jáne ırrıgatsııa mınıstrligi elimizdiń sý qoımalaryndaǵy jaǵdaıdy baıandady. 

Aqmola oblysynda Astana jáne Sileti sý qoımalary 100%-ǵa toly. Eki nysan da shtattyq kestege saı jumys istep tur.

Soltústik Qazaqstan oblysyndaǵy 2 iri sý qoımasy 100%-ǵa toly, óńirde sý tasqyny jalǵasyp jatyr.

Sergeev sý qoımasy bógetiniń jotasynan sýdyń asý bıiktigi — 348 santımetr.

Osy saǵatqa Petropavl qalasy shegindegi Esil ózeniniń deńgeıi — 1284 sm, bir táýlikte 28 sm tómendedi.

Aqtóbe oblysyndaǵy eki iri sý qoımasynyń ortasha sý jınaý kórsetkishi — 97%. Eki nysan da shtattyq kestege saı jumys istep jatyr. Óńirdegi jaǵdaı turaqty.

Shyǵys Qazaqstan oblysyndaǵy eki iri sý qoımasy boıynsha ortasha sý jınaý kórsetkishi — 81%.

Abaı oblysynda Shúlbi sý qoımasy 67%-ǵa toldy. Óńirde sý tasqyny jalǵasyp jatyr. 

Shúlbi sý qoımasyna búıirlik aǵyndardyń ulǵaıýyna baılanysty tabıǵatty qorǵaý maqsatynda sý jiberilip jatyr.

Ertis kaskadynyń sý qoımalary shtattyq kestege saı jumys istep tur.

Batys Qazaqstan oblysyndaǵy tórt iri sý qoımasynyń ortasha sý jınaý kórsetkishi — 85%. 

Onyń barlyǵy shtattyq rejımde jumys isteıdi. Reseımen shekarada Jaıyq ózeniniń deńgeıi — 899 sm.

Qaraǵandy oblysyndaǵy 3 iri sý qoımasy 98%-ǵa toly. Jaǵdaı turaqty.

Qostanaı oblysynda eki iri sý qoımasynyń ortasha sý jınaý kórsetkishi — 92%. Eki nysan da shtattyq kestege saı istep tur.

Nysandarda táýlik boıy kezekshilik jalǵasady, saǵat saıyn sý sharýashylyǵy jaǵdaıyna monıtorıng júrgiziledi.