Elimizdiń sý aıdyndarynda qaýipsizdik sharalary kúsheıtildi
ASTANA. KAZINFORM — Barlyq óńirde jazataıym oqıǵalardyń aldyn alý jáne demalýshylardyń qaýipsizdigin qamtamasyz etý maqsatynda reıdter, patrýldeý sharalary, oqytý aktsııalary men túsindirý jumystary júrgizilip jatyr, dep habarlaıdy TJM baspasóz qyzmeti.
Jambyl oblysynda TJD qyzmetkerleri prokýratýra, jergilikti atqarýshy organdar jáne buqaralyq aqparat quraldarynyń ókilderimen birlesip, Taraz qalasynyń sý aıdyndarynda reıdtik is-sharalar ótkizdi. Profılaktıkalyq jumys barysynda turǵyndarǵa sýdaǵy qaýipsizdik qaǵıdalary eskertildi, sondaı-aq tyıym salý belgilerine túgendeý júrgizilip, olardy ornatý jumystary atqaryldy. «Zerbulaq» demalys aımaǵynda jedel-qutqarý jasaǵynyń qutqarýshylary men Apattar medıtsınasy ortalyǵynyń mamandary alǵashqy kómek kórsetý jáne sýǵa batyp bara jatqan adamdy qutqarý boıynsha tájirıbelik sabaqtar uıymdastyryp, tótenshe jaǵdaı týyndaǵan kezdegi is-qımyl algorıtmin kórsetti.
Túrkistan oblysynda óńirdiń sý aıdyndarynda týrıstik polıtsııa, shekara qyzmeti, Ulttyq ulan, volonterler jáne qutqarýshylardyń qatysýymen birlesken patrýldeý jumystary júrgizildi. Aktsııaǵa qatysýshylar demalýshylarmen profılaktıkalyq áńgimeler ótkizip, jadynamalar taratyp, sýdaǵy qaýipsizdik sharalaryn saqtaý qajettigin eske saldy.
Shymkent qalasynda «Rahat-Badam» demalys aımaǵynda qaýipsizdik máselelerine erekshe kóńil bólindi. Munda jergilikti atqarýshy organdar, polıtsııa qyzmetkerleri men eriktilerdiń qatysýymen aýqymdy profılaktıkalyq aktsııa ótkizildi. Azamattarǵa sý aıdyndary mańynda qaýipsiz demalý qaǵıdalary, balalardy únemi baqylaýda ustaý qajettigi, mas kúıinde shomylýǵa jol bermeý jáne tótenshe jaǵdaılar kezindegi is-qımyl tártibi túsindirildi.
Shyǵys Qazaqstan oblysynda Novostroıka aýyly mańyndaǵy Buqtyrma sý qoımasynyń Samar jaǵalaýynda maýsymdyq qutqarý beketi óz jumysyn bastady. Jazǵy kezeń boıy munda jedel-qutqarý jasaǵynyń qyzmetkerleri, órt sóndirý bólimsheleriniń mamandary jáne Qasym Qaısenov atyndaǵy № 68303 áskerı bóliminiń ekinshi qutqarý batalonynyń áskerı qyzmetshileri kezekshilik atqarady. Beket oqıǵalarǵa jedel áreket etý úshin qajetti tehnıkamen jáne júzý quraldarymen jabdyqtalǵan. Patrýldeý kater men gıdrotsıkldiń kómegimen júzege asyrylady, sondaı-aq uzyndyǵy shamamen 110 shaqyrymdy quraıtyn jaǵalaý boıynda órt qaýipsizdigi talaptarynyń saqtalýyna monıtorıng júrgiziledi.
Almaty oblysynda TJD qyzmetkerleri óńirdegi barlyq sý aıdynynda kúndizgi jáne túngi ýaqytta kún saıyn profılaktıkalyq reıdter júrgizip jatyr. Erekshe nazar Qapshaǵaı sý qoımasy men Kólsaı kólderin qosa alǵanda, jappaı demalys oryndaryna aýdarylyp otyr. Baqylaý tıimdiligin arttyrý maqsatynda kvadrotsıklder, ushqyshsyz ushý apparattary jáne kınologııalyq eseptoptar paıdalanylady. Sonymen qatar balalardy saýyqtyrý lagerlerinde de profılaktıkalyq jumystar júrgizilip, sýdaǵy qaýipsiz minez-qulyq qaǵıdalary boıynsha áńgimeler men nusqamalar ótkiziledi. Shomylý maýsymy 1 maýsymda bastalǵanyna qaramastan, Almaty oblysynda sý aıdyndaryndaǵy qaýipsizdik qaǵıdalaryn buzǵany úshin 43 adam ákimshilik jaýapkershilikke tartyldy. Sondaı-aq kóliktik baqylaý ınspektsııasymen birlesip, qajetti ruqsat qujattary men tirkeý nómirlerinsiz paıdalanylǵan bes shaǵyn kólemdi keme arnaıy turaqqa qoıyldy.
Qazaqstan TJM qarapaıym qaýipsizdik qaǵıdalaryn saqtaý, balalarǵa muqııat qaraý jáne qaýipti áreketterden bas tartý qaıǵyly jaǵdaılardyń aldyn alyp, adam ómirin saqtap qalýǵa múmkindik beretinin eske salady.
