Elimizdiń sý sharýashylyǵyna eki jylda rekordtyq 677 mlrd teńge ınvestıtsııa tartyldy
ASTANA. KAZINFORM – Memleket basshysynyń tapsyrmasy aıasynda Sý resýrstary jáne ırrıgatsııa mınıstrligi Qazaqstannyń sý sharýashylyǵyn damytýǵa ınvestıtsııa tartý jumystaryn belsendi júrgizip keledi. 2024-2025 jyldary, ıaǵnı mınıstrlik qurylǵannan keıingi kezeńde ınvestıtsııa kólemi aldyńǵy eki jylmen salystyrǵanda 79%-ǵa ósti.
QR Sý resýrstary jáne ırrıgatsııa mınıstrligi baspasóz qyzmetiniń habarlaýynsha, 2024-2025 jyldary tartylǵan ınvestıtsııanyń jalpy kólemi shamamen 677 mlrd teńgeni qurady. Bul 2022-2023 jyldarmen salystyrǵanda shamamen 300 mlrd teńgege kóp. Ol kezde sý salasyn damytýǵa 377,9 mlrd teńge ınvestıtsııa tartylǵan bolatyn.
-Tartylǵan ınvestıtsııalar eń aldymen sý sharýashylyǵy ınfraqurylymyn salýǵa jáne jańǵyrtýǵa baǵyttalyp jatyr. Atap aıtqanda, halyq pen aýyl sharýashylyǵyn turaqty sýmen qamtamasyz etýge qajetti sý qoımalary, kanaldar, gıdrotehnıkalyq qurylystar jáne basqa da nysandar qamtylǵan,-delingen habarlamada.
Bul jumystar qoldanystaǵy ınfraqurylymdy kezeń-kezeńimen jańartýǵa jáne sýdy jınaqtaý men bólý úshin jańa qýattar qurýǵa múmkindik beredi. Nátıjesinde ınvestıtsııalar sýmen jabdyqtaý senimdiligin arttyryp, sý shyǵyny kólemin azaıtýǵa jáne sý resýrstaryn basqarý tıimdiligin arttyrýǵa baǵyttalady.
Investıtsııalar esebinen iske asyrylyp jatqan jobalardyń qatarynda Islam damý bankimen birlesip Jambyl, Batys Qazaqstan jáne Qyzylorda oblystarynda úsh sý qoımasyn salý, Azııa damý bankiniń qoldaýymen Aqmola oblysynda Esil kontrrettegishin salý jáne basqa da aýqymdy jobalar bar.
-Investıtsııalar sý sharýashylyǵy ınfraqurylymyn damytýǵa, ıaǵnı sý qoımalaryn, kanaldar men basqa da nysandardy salýǵa, rekonstrýktsııalaýǵa jáne jańǵyrtýǵa tartylady. Bul rette halyqaralyq yntymaqtastyq qarjylyq qoldaýmen ǵana shektelmeıdi. Ol sondaı-aq zamanaýı tehnologııalardy engizýdi, salany tsıfrlandyrýdy, kadrlyq jáne ǵylymı áleýetti nyǵaıtýdy, sondaı-aq ozyq tájirıbe almasýdy kózdeıdi, – dedi Sý resýrstary jáne ırrıgatsııa mınıstri Nurjan Nurjigitov.
Osyǵan deıin mınıstr Nurjan Nurjigitov sý qaýipsizdigi úshin naqty birlesken tetikter qajet ekenin aıtqan bolatyn.
