Elimizdiń sý sharýashylyǵy salasynda 29 myńnan asa adam eńbek etedi
ASTANA. KAZINFORM — 9 shildede Qazaqstanda Sý sharýashylyǵy qyzmetkerleri kúni atap ótiledi. Búginde elimizdiń sý sharýashylyǵy salasynda 29 myńnan astam adam eńbek etip júr, dep habarlaıdy Sý resýrstary jáne ırrıgatsııa mınıstrliginiń baspasóz qyzmeti.
Onyń ishinde 10,9 myńnan astamy Sý resýrstary jáne ırrıgatsııa mınıstrligi júıesinde jumys isteıdi. Atap aıtqanda, mınıstrliktiń ortalyq apparatynda 176 qyzmetker, Sý sharýashylyǵy komıtetinde 37 adam eńbek etedi.
Al Sý resýrstaryn retteý, qorǵaý jáne paıdalaný komıteti men basseındik sý ınspektsııalarynda 222 maman qyzmet atqarady.
«Qazsýshar» RMK-da 9889 adam, «Sý resýrstarynyń aqparattyq-taldaý ortalyǵy» KEAQ-da 65 qyzmetker jumys isteıdi.
«Qazgıdrogeologııa» ulttyq gıdrogeologııalyq qyzmetinde 368 maman, Qazaq sý sharýashylyǵy ǵylymı-zertteý ınstıtýtynda 101 maman eńbek etedi.
Sondaı-aq «SK Water Solutions» JShS-da 45 adam, óńirlik memlekettik mekemelerde 9 qyzmetker jumys isteıdi.
Sý resýrstary jáne ırrıgatsııa mınıstri Nurjan Nurjigitov Qazaqstannyń sý sharýashylyǵy salasy qyzmetkerlerin kásibı merekesimen quttyqtady.
— Qurmetti áriptester! Sizderdi Sý sharýashylyǵy qyzmetkerleri kúnimen shyn júrekten quttyqtaımyn! Árqaısyńyzǵa zor densaýlyq, qajymas qaırat, kásibı jetistik jáne otbasylaryńyzǵa amandyq tileımin. Sizderdiń eren eńbekterińizdiń arqasynda elimizdiń sý qaýipsizdigi qamtamasyz etilip, aýyl sharýashylyǵy men ónerkásip sııaqty ekonomıkanyń mańyzdy salalarynyń turaqty damýyna negiz qalanyp otyr. Sizder sý tasqyny kezeńinde sýdyń qaýipsiz ótkizilýin, vegetatsııa kezeńinde egistik alqaptaryna sýdyń turaqty jetkizilýin jáne gıdrotehnıkalyq nysandardyń senimdi jumysyn qamtamasyz etip kelesizder. Sizderdiń eńbekterińiz nazardan tys qalmaıdy. Mınıstrlik aldaǵy ýaqytta da sý salasy mamandarynyń mártebesin arttyrý baǵytyndaǵy júıeli jumystardy jalǵastyra beredi, — dedi Sý resýrstary jáne ırrıgatsııa mınıstri Nurjan Nurjigitov.
Mınıstrlik qurylǵan kúnnen bastap sý sharýashylyǵy mamandarynyń mártebesin kóterýge jáne olardyń eńbek jaǵdaıyn jaqsartýǵa erekshe kóńil bólip keledi. Sońǵy eki jarym jylda «Qazsýshar» RMK qyzmetkerleriniń jalaqysy orta eseppen eki esege artty.
Budan bólek, «Qazaqstannyń sý sharýashylyǵy salasynyń eńbek sińirgen qaıratkeri» jańa memlekettik nagradasy taǵaıyndaldy.
Sala qyzmetkerlerin áleýmettik qoldaý sharalary da kezeń-kezeńimen júzege asyrylyp jatyr. Máselen, 2024 jyly sý sharýashylyǵy mamandyqtary alǵash ret «Dıplommen — aýylǵa!» memlekettik baǵdarlamasyna engizildi. Búginde «Qazsýshardyń» Jambyl fılıalynyń birneshe mamany kóterme járdemaqy aldy. Al byltyr salanyń alty mamany «Naýryz jumysker» ıpotekalyq baǵdarlamasynyń qatysýshysy atandy.
2025 jyly «Qazsýshar» RMK fılıaldaryna 576 tehnıka berildi. Buǵan qosa, tarıf qarajaty esebinen taǵy 135 tehnıka satyp alyndy. Sonyń nátıjesinde kásiporynnyń tehnıka parki 27%-ǵa jańartyldy.
Sondaı-aq «Qazsýshardyń» 435 maýsymdyq qyzmetkeri turaqty jumys oryndarymen qamtamasyz etildi.
Osyǵan deıin búgin atalyp ótetin kásibı merekege oraı Kazinform tilshisi saladaǵy ózgeristerge, júzege asyp jatqan reformalar men máselelerge sholý jasady.
