Elimizdiń sý salasyna qandaı halyqaralyq basqarýshy kompanııalar tartylady
ASTANA. KAZINFORM – Sý salasynda birneshe azııalyq kompanııamen kelissóz júrgizilip jatyr. Bul týraly búgin Úkimet otyrysynda Ónerkásip jáne qurylys vıtse-mınıstri Qýandyq Qajkenov aıtty.
– 2025 jylǵy 8 qyrkúıekte Memleket basshysy halyqqa Joldaýynda sý salasynda halyqaralyq tájirıbe men biliktilikti qoldanýdy, onyń ishinde basqarýshy kompanııalardy tartýdy tapsyrǵan bolatyn. Osy tapsyrmany oryndaý maqsatynda ótken jyly jetekshi eýropalyq jáne azııalyq basqarýshy kompanııalarmen kelissózder júrgizildi, - dedi ol.
Vıtse-mınıstrdiń aıtýynsha, kelissózder nátıjesinde álem boıynsha tájirıbesi bar eń iri halyqaralyq jelilik operatorlar – Veolia, Suez jáne Aqualia kompanııalarymen yntymaqtastyq týraly memorandýmdarǵa qol qoıyldy.
– Atap ótetrligi, bul format aktıvterdi berý emes, memleket baqylaýyn saqtaı otyryp, basqarýshylyq kompetentsııalar men halyqaralyq úzdik tájirıbelerdi tartýǵa baǵyttalǵan. Qazirgi ýaqytta birneshe azııalyq kompanııamen kelissóz jalǵasýda, - dedi Qýandyq Qajkenov.
Buǵan deıin elimizdegi 90 qala men 7,5 mıllıon turǵyny bar 6 087 aýyl aýyz sýmen 100 paıyz tolyq qamtamasyz etilgenin jazǵan edik.