Elimizdiń sý qoımalarynan alynǵan synamalardyń 10% sanıtarlyq normalarǵa qaıshy

ASTANA. KAZINFORM – Elimizdiń Ekologııa jáne tabıǵı resýrstar mınıstrligi sý tasqyny kezinde sýdyń sapasyna júrgizilgen taldaýǵa qatysty aqparat berdi.

«Tasqyn sý kezeńinde Aqmola, Aqtóbe, Atyraý, Batys Qazaqstan, Qaraǵandy, Qostanaı, Soltústik Qazaqstan, Shyǵys Qazaqstan, Pavlodar, Ulytaý jáne Abaı oblystarynda sý obektileriniń jaı-kúıine baqylaý kúsheıtildi. 2024 jyldyń ótken kezeńinde I sanattaǵy ashyq sý aıdyndarynan sanıtarlyq-ekologııalyq monıtorıng sheńberinde mıkrobıologııalyq kórsetkishterge 1077 synama alyndy. Onyń ishinde 71 (6,6%) synama sáıkes emes, sanıtarlyq-hımııalyq kórsetkishterge 998 sý synamasy alyndy, onyń ishinde 95 synama (9,5%) sáıkes kelmeıdi», - dep jaýap berdi mınıstrlik Kazinform agenttiginiń resmı saýalyna.

Sondaı-aq, II sanattaǵy ashyq sý aıdyndarynan mıkrobıologııalyq kórsetkishterge 1258 synama alynǵan. Onyń ishinde 23-i (1,8%) sáıkes emes, al sanıtarlyq-hımııalyq kórsetkishter boıynsha alynǵan 1189 sý synamasynyń 61-i (5,1%) sáıkes bolmaı shyqqan.

«Qazaqstan Respýblıkasynyń halyq densaýlyǵy jáne densaýlyq saqtaý júıesi týraly kodeksiniń 114-babyna sáıkes halyqtyń sanıtarlyq-epıdemıologııalyq salamattylyǵy salasyndaǵy ýákiletti organ sanıtarııalyq-epıdemıologııalyq baqylaýǵa jáne qadaǵalaýǵa jatatyn obektiler men ónimderge, qorshaǵan orta obektilerine (topyraq, sý, aýa) qatysty sanıtarııalyq-epıdemıologııalyq monıtorıng júrgizedi. Qazaqstan Respýblıkasynyń Densaýlyq saqtaý mınıstriniń 2020 jylǵy 13 qarashadaǵy QR DSM-193/2020 buıryǵyn oryndaý úshin komıtettiń aýmaqtyq bólimsheleri sý obektileriniń jaı-kúıine, atap aıtqanda I jáne II sanattaǵy sý aıdyndaryna sanıtarlyq-ekologııalyq monıtorıng júrgizedi», - delingen saýal jaýabynda.