Elimizdiń sot júıesin reformalaý qalaı júzege asyrylyp jatyr – dóńgelek ústel
ASTANA.KAZINFORM - Astanada «Sot tóreligi júıesiniń tıimdiligin arttyrý» atty taqyrypta dóńgelek ústel otyrysy ótti, dep habarlaıdy QR Joǵarǵy sotynyń baspasóz qyzmeti.
Otyrys barysynda QR Prezıdentiniń quqyqtyq máseleler jónindegi kómekshisi Erjan Jıenbaev qatysýshylarǵa izgi tilegin bildire kele, sot tóreliginiń tıimdiligin arttyrý Memleket basshysy belgilegen strategııalyq mindet ekenin erekshe atap ótti.
Ol quqyqtyq memleket standarttaryna sáıkes sot júıesin odan ári damytý úshin berik negiz qurýdyń mańyzdylyǵyn, sondaı-aq ozyq halyqaralyq tájirıbeni engizý qajettigin aıtyp ótti.
Іs-sharany ashqan Joǵarǵy sot tóraǵasy Aslambek Merǵalıev Qazaqstan basshysynyń bastamalaryn júzege asyrý jáne elimizdiń sot júıesinde onyń tıimdiligin, ashyqtyǵy men qoljetimdiligin arttyrýǵa, onyń ishinde tsıfrlyq tehnologııalardy engizýge jáne ozyq halyqaralyq praktıkany eskere otyryp, júıeli qaıta qurylymdaýǵa baǵyttalǵan reformalardy júzege asyrý barysy týraly baıandady.
Qoǵamnyń zamanaýı talaptaryna jaýap beretin jáne barlyq azamattar úshin sot tóreliginiń qoljetimdiligin qamtamasyz etetin sot júıesin qurýǵa umtylys týraly aıta kele, Joǵarǵy sot tóraǵasy basqa elderdiń tájirıbesi men sheteldik seriktesterdiń usynymdaryn eskere otyryp, sýdıalardyń qyzmetin jeke baǵalaý ádistemesiniń jetildirilip jatqanyn, sot protsesiniń ashyqtyǵyn arttyrýdy, IT-sheshimderdi engizýdi, sýbektilik faktordy azaıtýdy, sondaı-aq sot júıesin bilikti kadrlarmen qamtamasyz etýdi atap ótti.
Astanadaǵy EQYU Baǵdarlamalar ofısiniń basshysy Folker Frobart, QR Konstıtýtsııalyq Sotynyń tóraǵasy Elvıra Azımova jáne Sot tóreliginiń tıimdiligi jónindegi Eýropalyq komıssııanyń tóraǵasy Franchesko Depaskýale qatysýshylarǵa izgi tilekterin bildire otyryp, Qazaqstandaǵy sot tóreligi júıesiniń tıimdiligin arttyrýdyń ózekti aspektilerin atap ótti.
MASA prezıdenti Pamela Harrıs Qazaqstannyń sot júıesine engizilgen ózgeristerdi áserli dep atap, olar sýdıalarǵa ákimshilik máselelerge alańdamaı, tek sot tóreligin júzege asyrýǵa nazar aýdarýǵa múmkindik beretinin aıtty. Spıker reformalardyń, eń aldymen, qysqa merzimde júrgizilip, eń jaqsy nátıje kórsetkendigi men áserli ekenin atap ótti. Negizgi ózgerister sot ákimshiliginiń jańa modelin, sottardy qarjylandyrýdy jaqsartýdy jáne tsıfrlandyrýdy damytýdy qamtıdy.
Jıynǵa qatysýshylar sýdıalardy kásibı baǵalaý ádistemesinde IT-ázirlemelerin qoldaný máselesine nazar aýdardy, bul osy rásimde adam faktorynyń yqpalyn boldyrmaıdy.
Sheteldik sarapshylar Qazaqstandaǵy sot ákimshiliginiń qazirgi modeli, sonyń ishinde IT-quraldary sottardyń jumysyna qalaı áser etkenine qyzyǵýshylyq tanytty.
Basqasha aıtqanda olar sot ákimshiliginiń jańa modeli sot ashyqtyǵyn arttyryp, aýqymdy derekterdi óńdeýdi jyldamdatyp, sot protsesine qatysýshylar arasyndaǵy úzilissiz baılanysty qamtamasyz etkenine, sot qatelerin azaıtyp, sotqa degen senimdi nyǵaıtýǵa yqpal etkeninen kóz jetkizdi. Olar sýdıalar men sot qyzmetkerlerin oqytýǵa qatysty da óz pikirlerin bildirdi.
Forým sot júıesindegi ózgeristerdi yntalandyratyn jáne barlyǵyna tıimdi jáne qoljetimdi sot tóreligin qamtamasyz etýge degen ortaq umtylysty qoldaıtyn ıdeıalarmen praktıka almasý alańyna aınaldy.
Oǵan sýdıalar, TMD elderiniń joǵarǵy sottarynyń basshylyǵy men sot qoǵamdastyǵy, sot tóreligi salasyndaǵy bedeldi uıymdardyń – Sot tóreliginiń sapasy jónindegi Eýropalyq komıssııanyń jáne Halyqaralyq sot ákimshiligi qaýymdastyǵynyń (IACA), AHQO Soty apparatynyń ókilderi, dıplomattar, halyqaralyq uıymdardyń ókilderi men sarapshylar, barlyǵy 100-ge jýyq adam qatysty.
Osyǵan deıin Joǵarǵy sot memlekettik organdar aınalasyndaǵy daý-damaı artqany týraly máimdegen bolatyn.
