Elimizdiń soltústik jáne ortalyq óńirlerin gazdandyrý jumystary keńeıtiledi
ASTANA. KAZINFORM - Qazaqstan halqyn gazdandyrý deńgeıin 80 paıyzǵa jetkizý úshin magıstraldyq gaz qubyrlary men óńirlik jelilerdi damytý, sondaı-aq gaz resýrstyq bazasyn keshendi túrde keńeıtý kózdelip otyr. Energetıka mınıstrligi osy maqsatta birqatar iri ınfraqurylymdyq jobany iske asyrýdy josparlap otyr.
Soltústik óńirlerdi gazdandyrýǵa arnalǵan strategııalyq jobalardyń biri – «Esil – Astana» gaz qubyry. Onyń iske asyrylýy Astana, Kókshetaý jáne Petropavl qalalaryn senimdi gazben qamtamasyz etýge múmkindik beredi.
Sonymen qatar «Beıneý – Bozoı – Shymkent» gaz qubyrynyń ekinshi jelisin salý josparlanǵan. Bul joba gaz tasymaldaý júıesiniń ótkizý qabiletin arttyryp, eldiń ońtústik jáne ortalyq óńirlerindegi gazǵa degen ósip kele jatqan suranysty qamtamasyz etýge múmkindik beredi.
Taǵy bir joba – Aqtóbe oblysyndaǵy KS-14 kompressorlyq stantsııasynan Qostanaı qalasyna deıin magıstraldyq gaz qubyryn salý. Sondaı-aq KS-14 alańynda jańa kompressorlyq tseh qurylysy kózdeledi. Joba Qostanaı oblysyn senimdi gazben qamtamasyz etip, soltústik óńirlerdi odan ári gazdandyrýǵa qosymsha múmkindik beredi.
Jetisý oblysynda «Taldyqorǵan – Úsharal» gaz qubyrynyń qurylysy aıaqtalyp, joba 2025 jyly paıdalanýǵa berildi. Uzyndyǵy shamamen 302 shaqyrym bolatyn qubyr óńirdegi eldi mekenderdi gazben qamtamasyz etip, gazdandyrý aıasyn 84 eldi mekenge deıin keńeıtýge múmkindik berdi.
Budan bólek, Almaty, Túrkistan, Qyzylorda, Jambyl, Qostanaı, Qaraǵandy jáne basqa da oblystarda jetkizýshi jáne taratý gaz jelileriniń qurylysy jalǵasady.
-Bul jobalardy iske asyrý elimizdiń gazben qamtý júıesiniń qurylymyn aıtarlyqtaı ózgertýge múmkindik beredi. Magıstraldyq jáne óńirlik ınfraqurylymdy damytý gazben jabdyqtaýdyń senimdiligin arttyryp, gaz tasymaldaý júıesiniń ótkizý qabiletin ulǵaıtýǵa jáne jekelegen óńirlerdiń bir ǵana baǵytqa nemese gaz kózine táýeldiligin tómendetýge baǵyttalǵan. Atalǵan jobalardy keshendi túrde iske asyrý Qazaqstandaǵy gazdandyrý deńgeıin 80 paıyzǵa jetkizýdiń mańyzdy sharttarynyń biri,-delingen habarlamada.
Osyǵan deıin elimizdi gazdandyrý qarqyny týraly jazdyq.
