Elimizdiń ishki jalpy ónimi alǵash ret 300 mıllıard dollardan aspaq — Toqaev

ASTANA. KAZINFORM — Bul týraly Memleket basshysy Qasym-Jomart Toqaev «Altyn sapa» jáne «Paryz» syılyǵynyń laýreattaryn, «Qazaqstannyń úzdik taýary» respýblıkalyq kórme-konkýrsynyń jeńimpazdaryn marapattaý rásiminde aıtty. 

— Básekege qabiletti bıznes — kez kelgen memlekettiń tiregi. Bıyl Qazaqstan ekonomıkasynyń ósimi 6 paıyzdan asady dep boljanýda. Bul — sońǵy on jyldaǵy eń joǵary kórsetkish. Elimizdiń ishki jalpy ónimi alǵash ret 300 mıllıard dollardan aspaq. Ózderińiz bilesizder, qazir biz ınfraqurylymdy damytýǵa, ekonomıkany ártaraptandyrýǵa basa mán berip jatyrmyz. Sondyqtan Úkimet daıyn ónim eksportyn arttyrý isimen belsendi túrde aınalysýy qajet. Qazirgi tańda bul salada biraz jetistikterimiz bar, — dedi Prezıdent. 

Prezıdent shıkizattyq emes eksport kólemi 2 esege jýyq ulǵaıǵanyn aıtty.

— Óńdeý ónerkásibindegi qosymsha qun kólemi bes jylda 25 paıyzdan astam ósti. Bul — taý-ken salasynan edáýir joǵary kórsetkish. Sońǵy jyldary negizgi kapıtalǵa tartylǵan ınvestıtsııa 70 paıyzǵa kóbeıdi. Naqty sektordaǵy eńbek ónimdiligi 40 paıyzǵa artty. Shıkizattyq emes eksport kólemi 2 esege jýyq ulǵaıdy.

Taýaryn shetelge ótkizetin kásiporyndar sany 3 ese kóbeıdi. Sonyń arqasynda búginde ónimderimiz 140 memleketke shyǵarylady. Qazaqstan taýarlary álemdik naryqtan óz ornyn alyp jatyr dep kúmánsiz aıtýǵa bolady. Osy oraıda, shaǵyn jáne orta bıznestiń róli aıryqsha ekeni sózsiz.

Jalpy, elimizdegi kásipkerliktiń damý qarqyny — belsendi, búginde olardyń ekonomıkadaǵy úlesi 40 paıyzǵa jetti.

Bes jylda shaǵyn jáne orta bıznes sýbektileriniń sany 1,5 ese artty, al shyǵarylatyn ónim kólemi 2,5 ese kóbeıdi. Elimizde jumys isteıtin azamattardyń jartysyna jýyǵy, ıaǵnı 4,5 mıllıon adam bıznes salasynda eńbek etedi, — dedi Memleket basshysy.

Aıta ketelik Qasym-Jomart Toqaev «Meıirim» ordenin taǵaıyndaǵan edi.