Elimizdiń ishki saıasat tujyrymdamasy qalaı ázirlenip jatyr

ASTANA. KAZINFORM – Elimizde ishki saıasat tujyrymdamasy ázirlenip jatyr. Bul týraly Memlekettik keńesshi Erlan Qarın málim etti. 

– Dál qazirgi ýaqytta, bul qujatty daıyndaý boıynsha jumystar josparǵa sáıkes júrip jatyr. Býrabaıda Ulttyq quryltaı ótkennen keıin, onyń qorytyndysy boıynsha arnaıy jınalys ótkizip, sol jerde Ulttyq quryltaıda kóterilgen árbir bastamany, Prezıdenttiń árbir tapsyrmasyn júzege asyrý boıynsha arnaıy jospar qabyldadyq. Ol birneshe tarmaqtan turady. Árbir bastama, tapsyrmanyń oryndalý merzimin sol jerde bekitip, josparlap qoıdyq. Sol qujatqa sáıkes, barlyq tapsyrmany tıisti júzege asyrý jumystary júrip jatyr, - dedi Erlan Qarın Májilis depýtaty Nartaı Aralbaıulyna bergen suhbatynda.

Sondaı-aq Memlekettik keńesshi atalǵan qujatty daıyndaýǵa sarapshylar tartylǵanyn aıtty jáne onyń sebebin túsindirdi. 

– Eń aldymen sarapshylardy tartyp jatyrmyz. Sebebi ol jan-jaqty qujat. Onyń ishindegi árbir qaǵıdat pysyqtaýdy talap etedi. Negizgi jobasyn Aıdos Sarym, Danııar Áshimbaev, Marat Shıbýtov jáne taǵy basqa áriptesterimiz, ıaǵnı Parlament depýtattarynyń qatysýymen daıyndalǵan bolatyn. Ulttyq quryltaıda bizdiń áriptester osyndaı qujat qabyldaý kerek eken dep, jáı ǵana oı aıtqan joq, sol qujatqa ený kerek degen negizgi sulbasyn da daıyndaǵan bolatyn. Keıinirek ony Qazaqstan strategııalyq zertteýler ınstıtýtynyń sarapshylarymen birlesip otyryp, ony ári qaraı pysyqtap, formaǵa keltirip, qujattyń negizgi nusqasyn usynǵanbyz. Sodan beri árbir talqylaýdan keıin qujattyń qurylymy, mazmuny kem degende 50 paıyzǵa ózgergen shyǵar. Tipti keıbir taraýlardy múldem alyp tastap nemese jańa bir taraý, bólimderdi engizdik.

Negizinen sarapshylar qaýymdastyǵy jáne ulttyq quryltaı músheleri belsene qatysyp jatyr. Ulttyq quryltaı músheleri jeke tulǵa ǵana emes, ár tulǵa belgili bir qaýymdastyq, belgili bir toptyń ókili. Sondyqtan bul jerde ártúrli baǵyttaǵy, kózqarastaǵy azamattardyń usynystaryn eskerýge tyrysyp jatyrmyz. Bul qujat jan-jaqty, múmkindiginshe qoǵamdaǵy, qazirgi ýaqytta ornyqqan saıası plıýralızmge sáıkes, ártúrli pikirdegi, ártúrli kózqarastaǵy azamattardyń oılaryn, usynystary eskeriletin jasalynatyn qujat bolady dep oılaımyn, - deıdi ol. 

Odan ári Erlan Qarın ishki saıasat tujyrymdamasynyń maqsatyn túsindirdi. 

– Bul qujat keıbireýler oılap júrgendeı, ıdeologııany jarııalap, ony bekitý emes. Men áleýmettik jelide keıbir pikirlerdi oqımyn. Keıbir sarapshylar bul qujatta ulttyq ıdeologııany jarııalap, bekitý keregin aıtady. Bul qujattyń maqsaty elde belgili bir saıası ıdeologııany resmı túrde bekitý dep túsinbegen jón.  

Belgili bir ıdeologııany, ıdeıany jarlyqpen, ókimmen, zańmen bekitý múmkin emes. Ol qoǵamnyń, memlekettiń, eldiń damýy barysynda ózi aıqyndalady. Sondyqtan da bul qujattyń maqsaty  belgili bir ıdeologııany, belgili bir ıdeıany kabınette oılap taýyp, jarııalaý emes. Qujattyń negizgi maqsaty – memlekettik ishki saıasattaǵy júrgizip jatqan jumystardy júıeleý, - dep tolyqtyrdy Memlekettik keńesshi.

Buǵan deıin Qazaqstan tarıhy boıynsha jaryq kóretin jeti tomdyqta Reseı, Qytaı, Parsy, Eýropa arhıvterinen tabylǵan tyń qujattar men derekter paıdalanylatynyn jazǵan edik. Bul týraly Memlekettik keńesshi Erlan Qarın depýtat Nartaı Aralbaıulyna bergen suhbatynda aıtty.