Elimizdiń shalǵaı aýyldarynda sapaly fılmder tegin kórsetilmek

ASTANA. KAZINFORM — Elimizde úzdik otandyq fılmderdiń onkúndigi bastaldy. Endi ýaqyt synynan ótip, kópshiliktiń ystyq yqylasyna bólengen kınotýyndylar kórermenniń aldyna ózi barady. Bul týraly Ulttyq kınony qoldaý ortalyǵy basqarma tóraǵasynyń orynbasary Ádilet Omarov Kazinform tilshisine bergen suhbatynda málimdedi.

– Bul 13 fılmnen turatyn toptama. Bul jerde anımatsııalyq fılmderden bastap, derekti, kórkem fılmder usynylady. Biz bul fılmderdi oblystarǵa tegin beremiz. Al olar barlyq qala, aýdan, aýyl, shalǵaı eldi mekenderge kórsetip, bizge esep berýi kerek, – deıdi Ádilet Omarov.

Ataýy «onkúndik» bolǵanymen, fılmder jyl boıy kórsetilmek. Otandyq kınotýyndylardy barlyq qala, aýdan, aýyl turǵyndary túgeldeı tegin kóre alady.

– Bul onkúndik jyldyń basynda Qaraǵandy oblysynda bastalǵan bolatyn. Sodan keıin Jambyl, SQO-da boldy. Qazir Batys Qazaqstan oblysynda jalǵasyp jatyr. Jyl sońyna deıin Qazaqstannyń barlyq óńirlerinde kórsetýdi josparlap otyrmyz, – deıdi basqarma qyzmetkeri.

Bul sharanyń maqsaty – el turǵyndaryna sapaly fılmderdi kórsetý. Solaı kıno mádenıetin qalyptastyryp, ulttyq kınematografııa salasyn damytý.

– Bizdiń maqsatymyz – ulttyq qundylyqtarymyzdy nasıhattaıtyn fılmderimizdi bir aýylda bir ǵana adam tursa da, sol kisige jetkizý. Ózderińiz bilesizder, bizde kınoteatrlar oblys ortalyqtary men qalalarda ǵana bar. Al aýdandarda joq. Sondyqtan biz osy bastamany qolǵa alyp, búgingi ulttyq kınonyń deńgeıin kóterip, kórermendi kásibı sapaly fılmderdi kórýge tárbıeleýimiz kerek, – deıdi Ulttyq kınony qoldaý ortalyǵy basqarma tóraǵasynyń orynbasary.

Bul fılmderdi kórý úshin qalaǵa ne aýdan ortalyǵyna baryp qajeti joq. Eger shalǵaı eldi mekende tursańyz, 13 fılmnen quralǵan toptama aldyńyzǵa ózi barady.

– Biz ár oblys ákimdikterimen baılanystamyz. Olarmen birge keste quryp, sol kestege saı ár aýdan, aýyldyń mádenıet ortalyqtarynda, mektepterdegi AKT zaldarynda tehnıkalyq múmkindikke sáıkes kórsetip jatyrmyz. Biz usynǵan fılmderdi kórý úshin qalaǵa kelýdiń qajeti joq. Kerisinshe, biz fılmderdi kórermenniń aldyna alyp baramyz, – deıdi Ádilet Omarov.

Aıta keteıik, endi qazaqstandyq fılmderdi «Kınopoıskten» kórýge bolady.