Elimizdiń segiz óńirinde jergilikti aýqymdaǵy 35 tótenshe jaǵdaı jarııalanǵan
ASTANA. KAZINFORM — Elimizdiń 8 óńirinde jergilikti aýqymdaǵy 35 tótenshe jaǵdaı jarııalanǵan. Bul týraly TJM azamattyq qorǵanys jáne áskerı bólimder komıtetiniń aǵa ofıtseri Erasyl Saıpash aıtty.
«Sý tasqyny bastalǵaly beri 99 920 adam, onyń ishinde 36 593 bala qaýipsiz jerlerge jetkizildi. 9 343 adam úılerine oraldy. Ýaqytsha ornalasý pýnkterine 6 566 adam, onyń ishinde 3 194 bala ornalasty. 9 mln tekshe metr erigen qar sýy soryp shyǵaryldy, 1,6 mln qapshyq jáne 1,2 mln tonna ınertti materıal tóseldi. Búgingi tańda avarııalyq-qutqarý jumystarynda 38 595 adam, 3 879 tehnıka, 17 áýe kemesi jumyldyryldy. Osy saǵatta Atyraý, Aqtóbe, Aqmola, Qostanaı, Shyǵys Qazaqstan, Soltústik Qazaqstan oblystarynda 3 544 jeke turǵyn úı, 567 aýla aýmaǵy jáne 1 778 saıajaı úıleri sý astynda qalýda. 3 071 turǵyn úı men 1 931 aýla aýmaǵynan sý buryldy», — dedi ol ortalyq kommýnıkatsııalar qyzmetindegi brıfıngte.
Onyń dereginshe qardyń tez erýi jáne Jabaı, Boqsyq, Jolboldy, Qalqutan, Esil, Torǵaı ózenderinde sý deńgeıiniń kóterilýine baılanysty Aqmola oblysynyń Atbasar, Bulandy, Astrahan, Jaqsy aýdandarynyń on eki eldi mekeninde, Soltústik Qazaqstan oblysy Qyzyljar aýdanynyń alty eldi mekeninde, Aqtóbe oblysynyń Yrǵyz aýdanynda 673 adam aldyn ala evakýatsııalandy.
«Elimizdiń 8 óńirinde Aqtóbe, Qostanaı, Batys Qazaqstan, Aqmola, Qaraǵandy, Atyraý, Soltústik Qazaqstan jáne Ulytaý oblystarynda jergilikti aýqymdaǵy 35 TJ áreket etedi. TJM azamattardy asa muqııat bolýǵa, sý tasqyny kezeńinde qaýipsizdik sharalaryn múltiksiz saqtaýǵa, úılerden jáne evakýatsııalaý pýnktterinen tıisti ruqsatsyz ketpeýge shaqyrady», — dedi Erasyl Saıpash.
