Elimizdiń respýblıkalyq avtojoldarynda qaýipsizdik kúsheıtilip keledi
ASTANA. KAZINFORM — Bıyl respýblıkalyq mańyzy bar avtojoldarda jol qozǵalysy qaýipsizdigin kúsheıtý jáne jol kólik oqıǵalarynyń sanyn azaıtý úshin keshendi sharalar iske asyrylyp jatyr. Bul týraly QR Kólik mınıstrliginiń baspasóz qyzmeti jarııalady.
Negizgi nazar trassalardy jańǵyrtýǵa, jaıaý júrginshilerdiń qaýipsizdigin qamtamasyz etýge, sondaı-aq jol qozǵalysy erejeleriniń saqtalýyn zamanaýı baqylaý ádisteri arqyly qadaǵalaýǵa baǵyttaldy.
Joldardyń sapasy men ótkizý qabiletin arttyrý maqsatynda avtojoldardy joǵary sanattarǵa kóshirý jumystary jalǵasyp jatyr. Bıyl shamamen 1 myń shaqyrym jol І jáne ІІ sanattarǵa deıin kóterilmek. Bul — qozǵalys qaýipsizdigin kúsheıtip, jol paıdalanýshylardyń júrip-turý jaılylyǵyn arttyrýǵa yqpal etedi. Aıta keteıik, qazirgi ýaqytta elimizde 3,6 myń shaqyrym jol І sanatqa, al 6,2 myń shaqyrym jol ІІ sanatqa jatady.
Jaıaý júrginshilerdiń qaýipsizdigin qamtamasyz etý jáne janýarlardyń qatysýymen bolatyn jol-kólik oqıǵalarynyń aldyn alý maqsatynda ınfraqurylymdy damytý jumystary jalǵasyp jatyr. Bıyl respýblıkalyq mańyzy bar tasjoldarda jaıaý júrginshilerge arnalǵan 4 jolústi ótkel salyndy. Nátıjesinde, olardyń jalpy sany 34-ke jetti.
Janýarlardyń jolǵa shyǵýynan týyndaıtyn qaýiptiń aldyn alý maqsatynda qosymsha 76 mal aıdaý ótkeli salynyp, uzyndyǵy 285 shaqyrym bolatyn qorshaý tor ornatyldy. Qazirgi ýaqytta elimiz boıynsha jalpy 383 mal aıdaý ótkeli men 2,2 myń shaqyrymnan astam qorshaý bar.
Qaýipti aımaqtarda jol qozǵalysy qaýipsizdigin arttyrý maqsatynda shamamen 4 myń sharshy metr bolatyn aýmaqqa shý jolaǵy tóseldi. Sondaı-aq 630 myńnan astam jol belgisi ornatylyp, 35 myń shaqyrymda jol tósem belgileri (jol syzyqtary) jańartyldy jáne 320 shaqyrym jol jaryqtandyryldy. Qysta, atap aıtqanda, boran, kóktaıǵaq, kóriný qashyqtyǵynyń tómendeýi sııaqty qolaısyz aýa raıy kezinde kólik qozǵalysyn qaýipsiz uıymdastyrý men jyldamdyq rejımin retteý boıynsha arnaıy sharalar júzege asyrylady.
Tehnıkalyq baıqaý júıesine de mańyzdy ózgerister engizildi. 2025 jylǵy 5 sáýirden bastap tehbaıqaý operatorlaryna qoıylatyn talaptar kúsheıtildi. Sondaı-aq formaldy túrde tehbaıqaý ótkizgen operatorlardyń qyzmetin 3 jylǵa deıin toqtatý qarastyrylǵan.
Sonymen qatar jol qaýipsizdigine qatysty normatıvtik-tehnıkalyq baza jańartylyp jatyr. Qazirgi ýaqytta osy saladaǵy 59 qujat qaıta qaralyp, onyń 11-i ózektendirildi. Budan bólek, Jol qaýipsizdigi jónindegi bes jyldyq strategııa ázirlenip jatyr. Atalǵan qujat memlekettik organdardyń naqty mindetterin belgilep, zańnamaǵa qajetti ózgerister engizýdi kózdeıdi.
Buǵan deıin Soltústik Qazaqstan oblysynda 4 myń shaqyrym jol tekserilip, birqatar kemshilik anyqtalǵany týraly jazdyq.