Elimizdiń iri saýda jelilerindegi taýarlardyń 60 paıyzy otandyq

ASTANA. KAZINFORM –  QR Saýda jáne ıntegratsııa mınıstri Arman Shaqqalıev Almatyǵa jumys sapary barysynda qazaqstandyq iri saýda jelisinde bolyp, kompanııa basshylyǵymen kezdesti, dep habarlaıdy mınıstrliktiń baspasóz qyzmeti.

Taraptar áleýmettik mańyzy bar azyq-túlik taýarlaryna, onyń ishinde kartop pen et baǵasynyń qoljetimdi bolýyna erekshe nazar aýdardy. Sharýalardyń úlken shyǵyndaryna qaramastan baǵanyń ósimin tejeý boıynsha birlesken is-qımyldar qajettigi aıtyldy.

Kezdesý aıasynda iri saýda jelilerindegi assortımenttiń 60% - ǵa jýyǵy otandyq taýarlar ekendigi aıtyldy. Bul qazaqstandyq óndirýshilerdiń bólshek saýdadaǵy joǵary deńgeıin kórsetedi.

Mınıstr otandyq óndirýshilerdiń saýda jelileriniń sórelerine qoljetimdiligin jeńildetý úshin jetkiziletin ónimniń standarttaryn pysyqtaýdy usyndy. Kompanııa basshylyǵy jetkizýshilerdi qoldaýdyń qoldanystaǵy sharalary týraly habarlady jáne jergilikti óndirýshilermen yntymaqtastyqty keńeıtýge qyzyǵýshylyq bildirdi, sonymen birge kásipkerler qosymsha qyzmetterdi kórsetýge erikti ekenin atap ótti.

Magnum kompanııasynyń basshysy ıAkov Fıshman saýda jelileri jetkizýshilerge óz taýarlaryn ilgeriletý úshin qandaı qyzmetter kórsetetini týraly aıtty. Osy yntymaqtastyqtyń arqasynda qazaqstandyq brendter keńinen tanymal bola bastady. Otandyq óndirýshilerdiń satylymy artyp, óndiris damyp, jańa jumys oryndary ashylýda. Saýda jelisiniń basshysy taýarlardy ilgeriletý qyzmetteri mindetti emes ekenin erekshe atap ótti. Ár seriktes ózine qajet nárseni ózi tańdaı alady.

Kezdesý qorytyndysy boıynsha saýda mınıstrliginiń qoldaýymen jetkizýshiler forýmyn ótkizý týraly ýaǵdalastyqqa qol jetkizildi.

Alań iri saýda jelilerimen jumys isteý sharttaryn talqylaýǵa jáne qazaqstandyqtardyń qoljetimdi baǵada sapaly otandyq ónimge qoljetimdiligin keńeıtýge múmkindik beredi.

Osyǵan deıin Prezıdent kórsetiletin qyzmetterdiń erkin saýdasy týraly zańǵa qol qoıǵany týraly jazdyq.