Elimizdiń iri qalalarynda qoqys óńdeý zaýyttaryn salý josparlanyp otyr
ASTANA. KAZINFORM – Qazaqstan Respýblıkasynyń Premer-mınıstri Oljas Bektenov Hunan Junxin Environmental Protection Co., Ltd kompanııasynyń dırektorlar keńesiniń tóraǵasy Daı Daogomen kezdesý ótkizdi, dep habarlaıdy Úkimettiń baspasóz qyzmeti.
Onda Almaty qalasynda qaldyqtardy energetıkalyq kádege jaratý zaýytyn salý jónindegi jobany júzege asyrý barysy talqylandy. Buǵan deıin Ekologııa jáne tabıǵı resýrstar mınıstrligi men Hunan Junxin Environmental Protection Co., Ltd kompanııasy arasynda qol qoıylǵan ınvestıtsııalyq kelisimge sáıkes osy jyldyń mamyr aıynda 145 mlrd teńgelik ınvestıtsııalyq joba júzege asyryla bastaǵan bolatyn.
Hunan Junxin Environmental Protection Co., Ltd dırektorlar keńesiniń tóraǵasy Daı Daogo joba boıynsha qurylys-montajdaý jumystaryn bastaýǵa daıyndyq júrip jatqanyn habarlady.
Qýaty táýligine 2 myń tonnaǵa deıingi qaldyqtardy qaıta óńdeýge jetetin kásiporyn 60 MVt-qa deıin elektr energııasyn óndire alady, kómir qyshqyl (CO2) gazynyń qaldyqtaryn jylyna 200 myń tonnaǵa deıin qysqartyp, jyl saıyn qoqys polıgony aýmaǵynyń shamamen 800 myń tekshe metr kólemin bosata alady. Qurylys kezeńinde keminde 700 jumys ornyn jáne iske qosylǵannan keıin 120 turaqty jumys ornyn qurý kózdelgen.
Oljas Bektenov Memleket basshysy Qasym-Jomart Toqaev ekologııalyq jaýapkershilik pen ekologııalyq mádenıetti qalyptastyrýǵa erekshe nazar aýdaratynyn atap ótti. Jańa Konstıtýtsııada qorshaǵan ortany qorǵaý memlekettik saıasat pen azamattyq jaýapkershiliktiń negizgi qaǵıdattarynyń biri retinde bekitilgen. Joǵary deńgeıde qol jetkizilgen ýaǵdalastyqtar saýda-ekonomıkalyq yntymaqtastyqty odan ári damytýǵa qolaıly jaǵdaı jasaıtyny atap ótildi.
Sonymen qatar kezdesý barysynda Qazaqstannyń basqa da óńirlerinde osyndaı jobalardy júzege asyrý arqyly qaldyqtardy kádege jaratý salasyndaǵy yntymaqtastyqty keńeıtý perspektıvalary talqylandy.
Kezdesý qorytyndysy boıynsha Premer-mınıstr Ekologııa jáne tabıǵı resýrstar mınıstrligine jáne basqa da jaýapty memlekettik organdarǵa kompanııamen shuǵyl túrde yntymaqtastyqtyń barlyq aspektilerin zerdeleýdi jáne bir aı ishinde Qazaqstannyń birqatar iri qalasynda qaldyqtardy kádege jaratý jónindegi zaýyttar salý týraly kelisimge qol qoıýǵa daıyndaýdy tapsyrdy.
Buǵan deıin habarlanǵandaı, Úkimet Qaraǵandy, Atyraý, Aqtóbe, Pavlodar jáne basqa da qalalarda qaldyqtardy kádege jaratý zaýyttaryn salý máselesin pysyqtaýda.
Al Almatyda qaldyqtardy energetıkalyq kádege jaratý jobasy qolǵa alyndy.
