Elimizdiń ortalyǵy men soltústiginde qatty jaýyn jaýady — Qazgıdromet

ASTANA. KAZINFORM — Elimizdiń ortalyǵy men soltústiginde qatty jaýyn jaýady. Bul týraly «Qazgıdromet» RMK baspasóz hatshysy Alına Ysmaǵulova aıtty.

«Respýblıkanyń ortalyǵynda túnde jaýyn-shashyn, kúndiz jańbyr jaýady. Qatty jańbyr ortalyqta, kúndiz eldiń soltústiginde bolady dep boljanýda. 8 sáýir kúni Qazaqstan aýmaǵynyń basym bóliginde atmosferalyq frontaldy bólinisteriniń ótýimen aýa-raıynyń turaqsyz sıpaty saqtalady, jańbyr jaýady. Tek ońtústik-batysta, ońtústik-shyǵysta jaýyn-shashynsyz aýa-raıy kútiledi. Qazaqstan boıynsha tuman bolady», — dedi Alına Ysmaǵulova.

Onyń atap ótýinshe, qazirgi ýaqytta Aqtóbe men Aqmola oblystarynda daýyl eskertý jarııalanǵanyn.

«Aqtóbe oblysy boıynsha 7-10 sáýir kúnderi aralyǵynda kúnniń jylynýyna jáne jaýyn-shashynnyń túsýine baılanysty ózen sýlarynyń kóterilip, jaıylatyndyǵy boljanady. Aqmola oblysynyń Zerendi, Astrahan, Sandyqtaý, Atbasar, Bulandy, Jaqsy, Esil, Jarqaıyń, Burabaı, Shortandy jáne Tselınograd aýdandarynda jańbyr túrindegi jaýyn-shashyn boljamyna baılanysty 7-10 sáýir aralyǵynda Jabaı, Qalqýtan (Kolýton) ózenderinde, olardyń búıirlik jáne joǵary aǵysynan erigen qar aǵynynyń qarqyndy qalyptasýy jáne muz qubylysynyń buzylýy kútiledi», — dedi ol.