Elimizdiń ońtústigindegi 103 ırrıgatsııalyq kanaldy avtomattandyrý bastaldy
ASTANA. KAZINFORM – Elimizdiń ońtústik óńirlerindegi 103 ırrıgatsııalyq kanaldy avtomattandyrý bastaldy. Bul týraly Úkimet otyrysynda Sý resýrstary jáne ırrıgatsııa mınıstri Nurjan Nurjigitov aıtty.
- Sý únemdeý tehnologııalaryn aýyl sharýashylyǵynda qarqyndy engizý úshin 2026-2028 jyldarǵa ınvestıtsııalyq shyǵyndardy óteýge jáne sýarý sýynyń qunyn sýbsıdııalaýǵa respýblıkalyq bıýdjetten qarjylandyrý tórt esege arttyryldy. Aldyńǵy úsh jyldyq kezeńde 55,5 mlrd teńge bolsa, 2026-2028 jyldarǵa 228,1 mlrd teńge bólindi. Onyń 89 paıyzy 5 ońtústik oblysqa tıesili, - dedi ol.
Mınıstrdiń aıtýynsha, vegetatsııalyq maýsymnyń bastalýyna deıin barlyq daıyndyq jumysy aıaqtaldy. Vegetatsııaaralyq kezeńde táýekelderdi azaıtý maqsatynda «Qazsýshar» fılıaldary 1840 shaqyrym ırrıgatsııalyq kanaldardy mehanıkalyq tazalaýdy júrgizdi. 680 shaqyrym ırrıgatsııalyq jelilerdi rekonstrýktsııalady jáne 375 gıdrotehnıkalyq qurylysty jóndeýden ótkizdi.
- Aýyl sharýashylyǵy óndirýshileriniń qajettilikterin qanaǵattandyrý úshin «Qazsýshar» fılıaldary 181 nasos agregatyn daıyndady. Sonymen qatar eń qıyn ýchaskelerge qosymsha 92 nasos satyp alý josparlanýda. Mysaly, «Dostyq» transshekaralyq kanalynda 8 agregattan turatyn 3 nasostyq stantsııany iske qosý kózdelip otyr - - dedi Nurjan Nurjigitov.
Onyń atap ótýinshe, sý sharýashylyǵyn tsıfrlandyrýǵa erekshe mán berilip otyr. Islam damý bankiniń qoldaýymen elimizdiń ońtústik óńirlerindegi 103 ırrıgatsııalyq kanaldy avtomattandyrýdy bastaldy. Bul kanaldardyń jalpy uzyndyǵy 906 shaqyrymdy quraıdy jáne 65 myń gektar jerdi sýǵarýǵa múmkindik beredi.
- Budan bólek, 2026-2028 jyldarǵa arnalǵan josparǵa sáıkes, buryn jańǵyrtylǵan ótken taǵy 270 kanaldy avtomattandyrý jumystary júrgizilýde, - dedi mınıstr.
Aıta keteıik, Úkimet otyrysynda kóktemgi dala jumystarynyń barysy talqyǵa salynyp jatyr.
