Elimizdiń ońtústiginde kún kúrt jylynýy yqtımal: Kólik mınıstrligi arnaıy keńes ótkizdi
Sınoptıkterdiń boljamynsha, jeltoqsan aıynyń sońynda elimizdiń ońtústik óńirlerinde kún kúrt jylynyp, ózen-kólderde sý tasý qaýpi týyndaýy yqtımal. Bul másele búgin Kólik mınıstrliginde avtomobıl joldaryn kútip ustaý boıynsha ótken arnaıy keńeste talqylandy, dep habarlaıdy Kazinform.
Mınıstrliktiń baspasóz qyzmetiniń habarlaýynsha, keńeske Kólik mınıstrligine qarasty Avtojoldar komıteti tóraǵasynyń orynbasary Ǵalymjan Ótenbaev «QazAvtoJol» ulttyq kompanııasy jáne «Qajservıs» JShS Almaty, Jambyl, Qyzylorda jáne Túrkistan, sondaı-aq Jetisý oblystary boıynsha fılıaldary basshylarynyń qatysty.
Jol mamandary jaýyn-shashynnyń kóp túsýine jáne aýa temperatýrasynyń joǵarylaýyna baılanysty bolýy yqtımal sý tasqynynyń aldyn alý boıynsha sharalardy talqylady.
Óńirlerden kelgen ókilder joldardaǵy jaǵdaı men júrgizilip jatqan jumystar týraly baıandady. Sóz kezeginde Ǵ.Ótenbaev sý tasqyny qaýpi bar ýchaskelerde kópirlerge, mal aıdyndaryna, qubyrlarǵa jáne jasandy qurylystarǵa monıtorıng júrgizýdi, sonymen birge sý aıdyndaryndaǵy sýdyń deńgeıin tekserýdi tapsyrdy.
Meteorologtardyń boljamy boıynsha, Túrkistan oblysynda 25 jeltoqsannan keıin temperatýra 11 gradýsqa deıin, Tarazda +13℃ deıin, Qyzylorda oblysynda +11℃ gradýsqa deıin, Shymkentte +14℃ deıin, Almatyda +11℃ deıin kóteriledi dep kútilýde. Kún 1 qańtarǵa deıin jyly bolýy múmkin.
