Elimizdiń ońtústiginde 270 shaqyrymǵa jýyq sýarý kanaly avtomattandyryldy

ASTANA. KAZINFORM — Sý resýrstary jáne ırrıgatsııa mınıstrligi Jambyl, Qyzylorda jáne Túrkistan oblystaryndaǵy jalpy uzyndyǵy 267,6 shaqyrym bolatyn sýarý kanalyn avtomattandyrý jumystaryn aıaqtaǵanyn habarlady.

sýarý kanaly
Foto: Sý resýrstary jáne ırrıgatsııa mınıstrligi

Jambyl oblysynda jalpy uzyndyǵy 156,5 shaqyrym Sol jaǵalaý aınalma kanalyna, Fýrmanov aınalma kanalyna jáne «Bazarbaı» kanalyna ýltradybystyq sý shyǵynyn ólshegishter men radarlyq sý deńgeıin ólsheýishter ornatyldy.

Sonymen qatar Túrkistan jáne Qyzylorda oblystaryndaǵy jalpy uzyndyǵy 112,1 shaqyrym bolatyn tórt magıstraldyq kanalǵa avtomattandyrylǵan sý deńgeıin ólsheýishter ornatý jumystary aıaqtaldy. Olardyń qatarynda D. Altynbekov atyndaǵy kanal, Úlken Keles magıstraldyq kanaly, Qyzylorda sý torabynyń oń jaǵalaý magıstraldyq kanaly jáne «Baıqadam» kanaly bar.

– Bul jumystar sý resýrstaryn dál esepke alýǵa jáne tıimdi paıdalanýǵa múmkindik beredi. Ásirese, vegetatsııa kezeńinde onyń mańyzy zor. Avtomattandyrý jáne tsıfrlyq quraldardy engizý – Qazaqstannyń sý sharýashylyǵy ınfraqurylymyn jańǵyrtýdyń negizgi baǵyttarynyń biri. Nátıjesinde elimizdiń sý qoryn basqarýdyń biryńǵaı júıesi qalyptasyp, sýdy bólý protsesi barynsha ashyq bolady, – dedi Sý resýrstary jáne ırrıgatsııa mınıstrligi Tsıfrlandyrý departamentiniń dırektory Erdáýlet Jumat.

Aıta keteıik, elimizdiń ońtústik óńirlerinde sý sharýashylyǵy ınfraqurylymyn keshendi jańǵyrtý aıasynda jalpy uzyndyǵy 857 shaqyrym bolatyn 103 sýarý kanalyn avtomattandyrý jumystary júrgizilip jatyr.

Bul 65 myń gektar sýarmaly jerdi qamtıdy. Budan bólek, buǵan deıin rekonstrýktsııadan ótken jalpy uzyndyǵy 1 184 shaqyrym bolatyn 270 kanaldy avtomattandyrý jumystary da qolǵa alynǵan.

Qostanaı oblysynda 14,2 shaqyrymdyq sý burý kanaly salynyp jatqanyn jazǵan edik.