Elimizdiń óńirlerinde tartylǵan et baǵasy qansha
Kazinform agenttiginiń tilshisi elimizdiń qaı qalasynda baǵa tómen ekenin anyqtady.
Sarapshylar tartylǵan et baǵasynyń ártúrli bolýyna birneshe faktor áser etedi dep esepteıdi. Birinshi sebep — tasymaldaý shyǵyny. Shalǵaı óńirler, sonymen birge kólik ınfraqurylymy nashar oblys turǵyndary úshin et baǵasy da joǵary bolatyny sózsiz. Daıyn ónim baǵasynyń joǵary bolýyna sol da áser etedi.
Sonymen birge baǵaǵa shıkizattyń alys-jaqyn bolýy áser etedi. Mal sharýashylyǵy jaqsy damyǵan óńirlerde et te, tartylǵan et te arzan.
Sonymen birge baǵaǵa turǵyndardyń tabysy áser etedi. Tabysy joǵary qalalarda (oǵan Almaty men Astanany jatqyzýǵa bolady) baǵa joǵary bolýy múmkin. Suranys kóp bolsa baǵa da ózgelerge qaraǵanda joǵary bolary sózsiz. Bir jaǵynan úlken qalalarda dúken men sýpermarket kóp, bul baǵa turaqtylyǵyn qamtamasyz etedi. Al shaǵyn eldimekenderde tańdaý az, bul baǵanyń joǵary bolýyna ákep soǵýy múmkin.
Baǵaǵa jyldyń túrli mezgili, suranys (mereke kezinde ósýi yqtımal), aýa raıy da áser etýi múmkin.
Ónimniń sapasy da (óndirýshi farshqa túrli et qosýy múmkin) baǵaǵa áser etip otyrady.
Eń arzan tartylǵan sıyr eti Taraz qalasynda satylady. Munda kelisi 2800-3500 teńge. Al Aqtóbe men Atyraýda baǵa sál joǵary. Munda kelisi 3000-3500 jáne 3000-3800 teńge bolyp tur. Kelisi 3200 teńge bolatyn farshty Kókshetaýdyń áleýmettik bazarynan satyp alýǵa bolady.
Semeı men Qostanaıda farsh baǵasy 3400 teńge. Al Petropavl, Túrkistan, Qyzylorda, Shymkentte farshtyń kelisi orta eseppen 3500 teńge. Qaraǵandy, Kókshetaý men Almatyda sıyr etiniń farshy 3600 teńge bolyp tur. Jezqazǵan, Pavlodar men Aqtaýda kelisi 3800 teńgeden bastalady. Eń qymbaty Óskemen men Oralda (3900 tg) jáne Astanada (3999 tg) bolyp shyqty.
Eń arzan taýyq farshy Qostanaı qalasynda satylady. Munda kelisi 726 teńge. Tarazda baǵa — 850 teńge. Pavlodar men Kókshetaýda tartylǵan taýyq etiniń kelisi 1800 jáne 1900 teńge turady. Ortasha baǵa Almaty (2000-2500 tg), Oral (2190 tg), Semeı (2400 tg) jáne Aqtaý (2400 teńge) qalalarynda tirkeldi. Al Petropavl, Óskemen jáne Aqtóbede odan sál joǵary. Baǵa — 2500 teńge. Atyraý, Qaraǵandy men Jazqazǵanda farsh baǵasy 2600 teńgeden bastalady. Al Túrkistanda 2700-3000 teńge, Astanada 2769-3035 teńge. Shamkentte taýyqtyń tartylǵan eti qymbat. Kelisi — 3245 teńge.
Keıbir óńirde qoı etiniń farshy da satylady. Shymkentte farshtyń bul túri arzan. Kelisi 3500-3800 teńge. Túrkistan men Atyraýda sál qymbat. Munda baǵa — 3600-3800 jáne 3650-4000 tg. Qaraǵandyda qoı etiniń farshy 3800 teńge turady. Al elimiz boıynsha eń qymbaty Jezqazǵanda tirkeldi. Munda farshtyń kelisi 4000 teńge.
Qazaqstanda shoshqa farshy bar, biraq óte az. Máselen Kókshetaýda kelisi 2400 teńge turady. Pavlodar men Qostanaıda baǵa — 2500 teńge. Aıtyp óteıik, Qostanaıda aralas farsh (sıyr men shoshqa eti) ta satylady. Baǵa 2800-3200 teńge. Al eń qymbaty Shymkent qalasynda. Munda shoshqa etiniń farshy 4000 teńge turady.
Buǵan deıin shaı men kofe, buqtyrylǵan et, qymyz ben shubat, baýyrsaq pen shelek, irimshik pen súzbe, ekzotıkalyq jemis baǵasy jazyldy.