Elimizde qandaı jańa óndirister, ınfraqurylymdyq jáne áleýmettik nysandar ashyldy
ASTANA. KAZINFORM – Memleket basshysy Qasym-Jomart Toqaevtyń tapsyrmalaryn júzege asyrý aıasynda elimizdiń óńirlerinde aýyl sharýashylyǵy shıkizatyn qaıta óńdeýdi tereńdetý, kólik jáne kommýnaldyq ınfraqurylymdy jańǵyrtý, azamattardy qoljetimdi baspanamen qamtamasyz etý boıynsha júıeli jumystar júrgizilip jatyr. Ótken aptada qandaı óndirister, kólik jáne áleýmettik ınfraqurylym nysandary iske qosylǵanyn Úkimettiń baspasóz qyzmeti jarııalady.
Qyzylordada halyqtyń áleýmettik osal sanattarynyń ishinde kezekte turǵandarǵa 90 páterdiń kilti tabystaldy. 4 jyl ishinde óńirde 30 myńnan astam kezekte turǵandar turǵyn úımen qamtamasyz etildi, 2026-2027 jyldary 25 myń adamǵa 62 myńnan astam páter tapsyrý josparlanyp otyr.
Aqmola oblysynyń Arshaly kentinde muqtajdar sanatyndaǵy 47 otbasy jańa 100 páterli úıden páter aldy.
Aqtóbe oblysynyń Jabasaq aýylyna kógildir otyn keldi. 43 shaqyrymdyq negizgi qubyr jáne 12,6 shaqyrymdyq kentishilik gaz qubyry tartylyp, bes júzden astam turǵyn gazǵa qol jetkizdi.
Kólik ınfraqurylymy
Arqalyqta 30 jyldan keıin qala áýejaıy keń aýqymdy rekonstrýktsııadan ótkizilgennen keıin turaqty áýe qatynasy qaıta jandandy. Aptasyna 2 ret Astana – Arqalyq; Almaty – Arqalyq; Qostanaı – Arqalyq baǵyttary boıynsha reıster iske qosyldy.
Pavlodar áýejaıynda ushý-qoný jolaǵyn rekonstrýktsııalaý aıaqtaldy. Zamanaýı áýe kemelerin qabyldaý úshin ushý-qony jolaǵy 45 metrden 60 metrge deıin keńeıtildi. Sýbsıdııalanatyn Astana-Pavlodar baǵyty iske qosyldy. 1 qyrkúıekte kúndelikti Pavlodar-Almaty jáne Pavlodar-Novosibir reısteri qaıta qatynaı bastaıdy.
Temirjol vokzaldaryn jańǵyrtýdyń jalpy respýblıkalyq baǵdarlamasy aıasynda taǵy eki iri nysanda jumystar aıaqtaldy. Búgingi tańda Qazaqstanda 74 vokzal salyndy jáne rekonstrýktsııalandy:
Aqtóbede jalpy aýdany 7 myń sharshy metrden astam temirjol vokzaly jańartylyp, qaıta ashyldy. Keshen táýligine 6 myńǵa jýyq jolaýshyǵa qyzmet kórsete alady. Ǵımaratta qasbet, shatyr, kútý zaldary, jeldetý jáne aýany baptaý júıeleri jańartyldy, platforma jańa qalqa shatyrlarmen jabylyp, qaýipsizdik júıeleri iske qosyldy jáne múmkindigi shekteýli azamattar úshin jaǵdaı jasaldy.
Qostanaı oblysynda Tobyl stansasynyń temirjol vokzalynyń ǵımaratyna júrgizilgen rekonstrýktsııa jumystary aıaqtaldy. Stansa táýligine 2 jolaýshy platformasyna jáne 13 jup poıyzǵa qyzmet kórsetedi, ortasha táýliktik jolaýshylar aǵyny – shamamen 235 adam.
Aqtóbe oblysynyń Oıyl aýdanynda 2024 jylǵy sý tasqyny kezinde qıraǵan Oıyl aýylyna baratyn avtojol boıyndaǵy 280 metrlik kópir paıdalanýǵa berildi. Nysan «Batys Qazaqstan – Ońtústik Qazaqstan» tranzıttik dálizine kiredi.
Tamaq ónerkásibi
Qostanaı oblysynda «Baıan Sulý» fabrıkasynyń «Kondıterlik astana» atty kesheni iske qosyldy. Qýaty jylyna 16,6 myń tonna ónim óndirýge jetetin joba Prezıdent Qasym-Jomart Toqaevtyń aýyl sharýashylyǵy shıkizatyn qaıta óńdeý úlesin 70%-ǵa deıin jetkizý jónindegi tapsyrmasy sheńberinde júzege asyryldy. Osylaısha kásiporynnyń jalpy qýaty jylyna 85 myńnan 101 myń tonnaǵa deıin artyp otyr.
Qazaqstan men Ózbekstan ónerkásiptik kooperatsııany tereńdetýge nıetti ekenin jazǵan edik.
