Elimizdiń óńirlerinde 14 jańa stadıon salý qajet

ASTANA. KAZINFORM — Elimiz boıynsha 1 694 fýtbol alańy qajet. Bul týraly Úkimet otyrysynda Sport jáne týrızm mınıstri Erbol Myrzabosynov aıtty.

- Memleket basshysynyń tapsyrmasyna sáıkes, oblys ortalyqtarynda demeýshilerdiń qarajaty esebinen jańa fýtbol stadıondarynyń qurylysy jáne qaıta jańartý jumystary júrgizilýde. Qyzylorda qalasynda 11 myń kórermenge arnalǵan ÝEFA talaptaryna saı, zamanaýı jabyny bar stadıon paıdalanýǵa berildi. Astanada 3 600 oryndyq stadıonnyń qurylysy júrip jatyr. Ony aıaqtaý 2026 jyldyń birinshi toqsanyna josparlanǵan. 14 jańa stadıon salý qajet. Olardyń 10-y boıynsha jobalaý-smetalyq qujattar daıyndalýda, - dedi Erbol Myrzabosynov.

Sonymen qatar ol jumys istep turǵan 7 stadıondy qaıta jańartý qajettigin aıtty.

- Qaraǵandy jáne Oral qalalarynda jóndeý jumystary júrip jatyr. Atyraý jáne Aqtaý qalalarynda jobalaý qujattary daıyndalyp, memlekettik saraptamadan oń qorytyndy alyndy. Óskemendegi stadıon jobasy saraptamadan ótýde. Almaty jáne Jezqazǵan qalalarynda 2 stadıon boıynsha jobalaý qujattaryn ázirleý qajet. Elde 7 432 fýtbol alańy bar, onyń 1 420-sy jóndeýdi qajet etedi. Qosymsha qajettilik – 1 694 alań. Osyǵan baılanysty mınıstrlik balalar fýtbol alańdaryn salý josparyn bekitti. Jergilikti bıýdjet pen jeke ınvestıtsııalar esebinen 685 joba iske asýda, - dedi mınıstr.

Aıta keteıik, Úkimet egin jınaý naýqanyn qorytyndylap, sporttyq ınfraqurylymdy damytý máselesin pysyqtap jatyr.