Elimizdiń namysyn qorǵap, jarys jolyna shyqqan ár sańlaqqa qurmetpen qaraǵan jón – Senat tóraǵasy

ASTANA. KAZINFORM – Qazaqstan Respýblıkasy Parlamenti Senatynyń tóraǵasy Máýlen Áshimbaev Parıj olımpıadasyndaǵy jeńisterge oraı Facebook jáne Instagram áleýmettik jelilerinde jazba qaldyrdy.

Onda bylaı delingen: «Keshe Parıjde el qorjynyna eki kúmis medal tústi. Árıne, jankúıerler «altyn» kútkeni anyq. Degenmen, Olımpıadanyń ár júldesi ońaılyqpen kelmeıdi. Sportshylarymyz baǵyndyrǵan belestiń bári – jyldar boıy tógilgen ter men eseli eńbektiń nátıjesi. Sondyqtan sheshýshi synǵa deıin súrinbeı jetken atletterimizge alǵystan basqa aıtarymyz joq. Biz úshin Eldostyń altyn medali qandaı qymbat bolsa, Demeý, Nurbek, Narıman baýyrlarymyzdyń «kúmisi», Ǵusman inimiz ben Nazym qaryndasymyz jáne mergenderimiz oljalaǵan «qola» da sonshalyqty baǵaly. Bul jeńistiń bári tutas qazaq sportyna tyń serpin berip, jattyǵý zalynda júrgen myńdaǵan jas sportshyǵa úlken úmit syılaǵany anyq. «Jeńistiń jeti atasy bar, al, jeńilis – jetim» deıdi. Osy oraıda, Parıjde júldesiz qalǵan qyz-jigitterimizge de qoldaý kórsetý asa mańyzdy. Bap pen baq únemi qatar shaba bermeıdi. Sol sebepti, elimizdiń namysyn qorǵap, jarys jolyna shyqqan ár sańlaqqa qurmetpen qaraǵan jón. Olımpıada oıyndary áli aıaqtalǵan joq. Apta sońyna deıin taǵy birqatar júlde sarapqa salynady. Sol básekelerde baq synaıtyn otandastarymyz namysty qoldan bermeıdi dep senemiz jáne soǵan tilekshimiz. Rýhymyz asqaqtap, týymyz kókte jelbireı bersin!»,-dep jazdy Senat tóraǵasy.