Elimizdiń munaı-gaz salasynda kadr tapshylyǵy bar – sarapshy
ASTANA. KAZINFORM – Sala mamandary kadr tapshylyǵynyń týyndaýy zańdylyq ekenin alǵa tartyp otyr. Sebebi, elimizde munaı-gaz baǵytynda kadr daıarlaıtyn oqý orny joq. Kompanııalar amalsyzdan óz ordasynda kishigirim daıarlyq mektebin ashyp, qyzmetkerlerin shetelge tájirıbe jınaqtaýǵa jiberetin kórinedi.
Ortalyq kommýnıkatsııalar qyzmeti alańynda ótken brıfıngte Qazaqstan munaı servıstik kompanııalar odaǵy prezıdıýmynyń tóraǵasy Rashıd Jaqsylyqov kadr daıarlaýǵa bas mán berý mańyzdy ekenin atap ótti.
«Qazaqstan munaı-gaz salasy – elimizdiń ekonomıkasynyń negizi. Qazir bul salada 250 myńǵa jýyq azamat jumys isteıdi. Dese de, kadr tapshylyǵy joq emes. Ásirese, bilikti ınjenerler qajet. Bul másele álemniń kóptegen elderinde de bar», - dedi ol.
Onyń aıtýynsha, Qazaqstanda jobalaý jumystaryn júrgizý joǵary mańyzǵa ıe. Qoǵamda «jobany qaı kompanııa júzege asyrady, qaı kompanııanyń ónimi satylyp alynýy kerek?» degen suraqtar jıi týyndaıtyn kórinedi. Bul rette, el Prezıdenti Qasym-Jomart Toqaev osy máselelerdi qolǵa alýdy tapsyrǵan. Ony iske asyrýda birneshe qıynshylyq bar.
«Buǵan deıin Qazaqstannyń jobalaý kompanııalary tek qana beıimdeý jumystarymen aınalysyp keldi. Shetelde daıyn joba ázirlenip, elge ákelindi. Bizde jumysshylardy, kadrlardy damytý máselesi óte kúrdeli. Beıimdeýge jáne jobalaýǵa kerekti tehnıka ekeýi ekibólek dúnıe. Sondyqtan jobalaý kompanııalaryn tehnıkalyq qamtamasyz etý kerek», - dedi spıker.
Rashıd Jaqsylyqovtyń aıtýynsha, Qazaqstandaǵy munaı óndirýshi kompanııalardyń ónimi 4%-dan aspaıdy. Sol úshin aldaǵy ýaqytta óndirýshiler men tutynýshylardyń baılanysyn nyǵaıtý kózdelgen. Saladaǵy kásiporyndardy 3 alpaýyt operatorlarmen tanystyryp, olardyń arasynda yntymaqtastyq ornatý josparda bar.
«Sońǵy 3 aıda búkil aımaqty aralap shyqtyq. Tipti, Soltústik Qazaqstanda munaı salasyna sizderdiń ónimderińiz qajet degende tań qaldyrǵan óndiris oryndary da boldy. Sondyqtan bul jumysty jalǵastyrýymyz kerek. Qazaqstanda óndirildi degen sapaly taýar kóp bolý kerek dep esepteımiz», - dedi Rashıd Jaqsylyqov.
