Elimizdiń munaı-gaz salasynda 13 mamandyq túri joıylyp ketýi múmkin
ASTANA.KAZINFORM – Qazaqstannyń munaı-gaz salasynda tehnologııalardyń damýyna baılanysty 13 mamandyq qajettiligi azaıyp bara jatqan qyzmet túri qataryna endi. Taǵy 7 kásiptiń atqaratyn qyzmeti ózgeredi. Bul týraly QR Energetıka mınıstrligi Kazinform agenttiginiń resmı saýalyna bergen jaýabynda málim etti.
Vedomstvonyń habarlaýynsha, tsıfrlyq tehnologııalar, óndiristi avtomattandyrý men robottandyrý munaı-gaz salasyndaǵy eńbekke jáne mamandardyń biliktiligine qoıylatyn talaptardy birtindep ózgertip jatyr.
– Qazaqstannyń jańa kásipter men quzyretter atlasynda munaı-gaz salasynyń geologııalyq barlaýdan bastap, óndirý, tasymaldaý, saqtaý jáne munaı men gazdy óńdeýge deıingi barlyq baǵyty zerttelgen. Salalyq zertteý nátıjeleri boıynsha 37 jańa, 7 ózgeretin jáne 13 joıylyp bara jatqan kásip anyqtaldy, - delingen jaýapta.
Saladaǵy ózgeriske óndiristi avtomattandyrý, jabdyqtardy qashyqtan basqarý, ushqyshsyz ushý apparattaryn paıdalaný, úlken derekterdi taldaý, mashınalyq oqytý jáne jasandy ıntellekt tehnologııalaryn engizý áser etip jatyr.
Sonymen qatar munaı-gaz salasynda tsıfrlyq jáne adam qatysýyn barynsha azaıtatyn ken oryndaryna kóshý, ken oryndary men munaı óńdeý zaýyttarynyń tsıfrlyq modelderin jasaý kózdelgen.
Mınıstrlik dástúrli mamandyqtar tolyǵymen joıylyp ketpeıtinin de atap ótti. Aldaǵy jyldary olardyń atqaratyn jumysy men mamandarǵa qoıylatyn talaptar ózgerýi múmkin. Osyǵan baılanysty sala qyzmetkerlerin qaıta daıarlaý jáne olardyń tsıfrlyq daǵdylaryn damytý mańyzdy baǵyttardyń birine aınalyp otyr.
