Elimizdiń mektepterinde fızıka, hımııa jáne robototehnıkaǵa arnalǵan 500 kabınet ashylady
ASTANA. KAZINFORM – Mektepterde joǵary jyldamdyqty ınternettiń bolýy basym mindetterdiń biri. Bul týraly Úkimet otyrysynda Premer-mınıstr Oljas Bektenov málim etti.
- Osy jyldyń 1 qyrkúıegine deıin fızıka, hımııa, bıologııa, robototehnıka boıynsha 500 pándik kabınetti satyp alýdy qamtamasyz etý qajet. Jalpy, jyl sońyna deıin elimizdiń mektepterinde barlyǵy 1400-den astam arnaıy kabınet ornatý kerek. Birqatar óńir tez arada qarjylandyrý máselesin sheshýge tıis. Birinshi kezekte, Almaty, Qaraǵandy, Soltústik Qazaqstan, Atyraý, Ulytaý jáne Aqmola oblystary atalǵan máselege nazar aýdaryńyzdar. Kabınetterge qajetti jabdyqtardy jyldam satyp alý úshin barlyq rásimderdi tezdetýdi tapsyramyn. Keshe Memleket basshysy ekonomıkany damytý jónindegi keńeste ınfraqurylymdyq jáne áleýmettik nysandardy jedeldetip salý kerektigin atap ótti. Osyǵan basa nazar aýdaryńyzdar, - dedi O. Bektenov.
Osy oraıda ol memlekettik organdar men ákimdikter aldaǵy kezeńge arnalǵan bıýdjetterdi qalyptastyrý barysynda atalǵan máseleni baqylaýǵa alýy qajet ekenin aıtty.
- Tsıfrlyq ınfraqurylym bilim berý sapasy men jasandy ıntellektini engizýge tikeleı áser etedi. Sondyqtan mektepterde joǵary jyldamdyqty ınternettiń bolýy – basym mindetterdiń biri. Jasandy ıntellekt mınıstrligi baılanys operatorlarymen jáne ákimdiktermen birlesip, joǵary jyldamdyqty ınternettiń, ásirese shalǵaı aýyldarda bolýyn qatań baqylaýda ustasyn. Jalpy alǵanda, bilim berýdiń barlyq deńgeıinde tsıfrlyq tehnologııalardy damytýǵa jáne jasandy ıntellektini engizýge, eń aldymen, bilim berý sapasy men tıimdiligin arttyrýǵa erekshe nazar aýdarý qajet, - dedi Úkimet basshysy.
Buǵan deıin habarlanǵandaı, eki oblysta mektepterdiń qaýipsizdik júıesinde kemshilikter anyqtaldy.
