Elimizdiń kitaphanalary 240 myńnan astam ádebıetpen tolyqty

ASTANA. KAZINFORM – 2025 jyly 119-dan astam kitap 240 500 dana taralymmen basylyp, elimizdiń óńirlik kitaphanalaryna jetkizildi. 

Mádenıet jáne aqparat mınıstrliginiń málimetinshe olardyń qatarynda «Shoqan. Erek týǵan fenomen» fotoalbomi, Abaı Qunanbaıulynyń 180 jyldyǵyna arnalǵan eńbekter, «Baqytsyz Jamal» shyǵarmasy, sondaı-aq Іlııas Esenberlın, Jumeken Nájimedenov, Qadyr Myrza Áli jáne Tumanbaı Moldaǵalıevtiń shyǵarmalar jınaǵy bar.

Halyqaralyq yntymaqtastyq aıasynda Italııa tarapynyń qoldaýymen Shoqan Ýálıhanov týraly kitaptyń ıtalıan jáne aǵylshyn tilderine aýdarylǵan nusqasynyń tanystyrylymy Rım qalasynda ótti.

Mádenıet jáne aqparat mınıstrligi elimizdiń Maındaǵy Frankfýrt qalasynda ótken eń iri halyqaralyq kitap jármeńkesine ekinshi ret qatysýyn da qoldady. Kórmede ulttyq pavılon uıymdastyrylyp, mereıtoılyq basylymdar, sonyń ishinde jeti tilge aýdarylǵan «Abaıdyń qara sózderi. Urpaqqa Ulaǵat» atty eńbegi tanystyryldy. Al «Baqytsyz Jamal» romany ulttyq prozanyń alǵashqy týyndylarynyń biri retinde halyqaralyq deńgeıde joǵary baǵaǵa ıe boldy.

Qazaq ádebıetin nasıhattaý jumysy el ishinde de jalǵasyn tapty. Mádenıet jáne aqparat mınıstrliginiń ókilderi Beıjiń men Gýanchjoý qalasynda ótken halyqaralyq kitap kórmelerine qatysyp, klassıkter men qazirgi zaman avtorlarynyń shyǵarmalaryn tanystyrdy.

Jas jazýshylardy qoldaýǵa erekshe kóńil bólindi. Mádenıet jáne aqparat mınıstrligi men Qazaqstan Jazýshylar odaǵy arasyndaǵy strategııalyq seriktestik aıasynda jańa avtorlar býynyn qalyptastyrýǵa baǵyttalǵan úsh aýqymdy joba júzege asty. Nátıjesinde 35 kórkem jáne ǵylymı-tanymdyq jınaq jaryq kórip, kitaphanalarǵa jetkizildi.

Aıta ketelik Ertis boıynyń oqyrmandary Almatydaǵy kitaptardy qashyqtan oqı alatyny týraly jazǵan edik.