Elimizdiń qorǵanys júıesin kúsheıtýge arnalǵan zań maquldandy - Senat
ASTANA. KAZINFORM – Búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine rezervtegi áskerı qyzmet jáne jekelegen ortalyq memlekettik organdardyń fýnktsııalaryn qaıta bólý máseleleri boıynsha ózgerister men tolyqtyrýlar engizý týraly» Zańy maquldandy.
- Bul zań elimizdiń qorǵanys júıesin kúsheıtýge ǵana emes, árbir azamattyń boıynda Otanǵa degen sheksiz súıispenshilik pen adaldyqty qalyptastyrýǵa da negiz bolady. Biz tek áskerı daıyndyqty arttyrýdy emes, eldik, ulttyq birlikti, patrıotızmdi nyǵaıtýdy maqsat etip otyrmyz. Áskerı rezerv - bul tek áskerı daıyndyq emes, bul árbir azamattyń aldyndaǵy boryshyn sezinýi, qajet bolǵan jaǵdaıda eline, jerine qyzmet etýge daıyn turýy. Qazirgi tańda jahandyq qaýipsizdik jaǵdaılaryna da mán beretin kez keldi, sondyqtan árbir azamattyń júreginde patrıottyq sezimniń oıanýy qajet. Bul sezim tek memlekettik saıasatpen ǵana emes, árbir adamnyń rýhanı boıynda qalyptasady. Óz eline degen qurmet pen súıispenshilik áreketterinen, onyń jerine degen adaldyǵyn kórsetedi, - dedi senator Amangeldi Nuǵmanov.
Senattyń Halyqaralyq qatynastar, qorǵanys jáne qaýipsizdik komıtetiniń málimetine qaraǵanda, Zań Qarýly Kúshterdi, basqa da áskerler men áskerı quralymdardy áskerı qımyldarǵa daıyn rezervtik kúshtermen qamtamasyz etý úshin quqyqtyq negiz qurý, sondaı-aq memlekettik organdardyń fýnktsııalaryn sý únemdeý tehnologııalaryn engizý bóliginde qaıta bólý maqsatynda ázirlendi.
Qujat aıasynda Sý, Qylmystyq, Qylmystyq-protsestik, Eńbek jáne Áleýmettik kodeksterge, Qazaqstan Respýblıkasynyń on tórt zańyna ózgerister men tolyqtyrýlar engiziledi. Máselen, túzetýlermen rezervtegi áskerı qyzmetke qabyldanatyn adamdarǵa qoıylatyn talaptar, onyń ishinde Qazaqstan azamattyǵynyń bolýy, jas shekteýleri (qatardaǵy jáne serjanttyq quram úshin on segiz jastan kishi emes jáne 47 jastan aspaǵan, ofıtserlik quram úshin 57 jastan aspaǵan), áıelderdi qospaǵanda, merzimdi áskerı qyzmetti ótkerý, áskerı kafedrada oqýdan nemese áskerı-tehnıkalyq mamandardy daıarlaý boıynsha áskerı daıarlyqtan ótý belgilenedi.
- Rezervtegi áskerı qyzmetti ótkerý týraly kelisimsharttyń merzimi, ony jasasýdyń jáne sabaqtar, jıyndar ótkizý tártibi aıqyndalady: kelisimshart erikti túrde úsh jylǵa jasalady, al jaýyngerlik daıarlyq boıynsha sabaqtar men jıyndar aı saıynǵy úsh kúnge deıingi sabaqtardy qosa alǵanda, jylyna kúntizbelik alpys kúnnen aspaıtyn ýaqytty alady. Áskerı rezervtegi adamdy áleýmettik qorǵaý boıynsha birqatar normalar kózdeledi. Atap aıtqanda, oǵan aı saıyn bıýdjet qarajaty esebinen eń tómen jalaqy, al jaýyngerlik daıarlyq boıynsha jıyndardan nemese daǵdarystyq ahýaldar kezindegi jıyndardan ótý kezeńinde eń tómen (jumyssyz adamǵa) jáne jumys orny boıynsha ortasha aılyq jalaqy (jumys isteıtin adamǵa) tólenedi, onyń jumys orny (laýazymy) saqtalady. Olardyń tolyq kólemde medıtsınalyq qamtamasyz etilý, tamaqtaný, jaraqat alǵan jaǵdaıda birjolǵy ótemaqy alý múmkindigi bekitiledi. Ol jıyndar men oqý-jattyǵýlar kezinde qaıtys bolǵan jaǵdaıda, birjolǵy aqshalaı ótemaqy, al onyń muragerlerine – 500 aılyq eseptik kórsetkish mólsherinde birjolǵy aqshalaı ótemaqy tóleý kózdeledi, - delingen Senat komıtetiniń aqparatynda.
Budan basqa, Zańnyń jekelegen normalarymen Aýyl sharýashylyǵy mınıstrliginiń sý berý jónindegi kórsetiletin qyzmetterdi sýbsıdııalaý jáne aýyl sharýashylyǵy taýaryn óndirýshilerge sý únemdeıtin sýarý tehnologııalaryn engizýge jumsaǵan shyǵyndaryn óteý bóligindegi fýnktsııalary Sý resýrstary jáne ırrıgatsııa mınıstrligine berildi.
Budan buryn habarlanǵandaı, Senat Qazaqstannyń bitimgerlerine arnalǵan ótemaqyǵa qatysty zańdy maquldady.