Elimizdiń kommýnaldyq jelilerin jóndeýge 6,8 trln teńge qajet

ASTANA. KAZINFORM – Elimizdiń kommýnaldyq jelilerin jóndeýge 6,8 trln teńge qajet. bul týraly Ulttyq ekonomıka mınıstrligi Tabıǵı monopolııalady retteý komıtetiniń tóraǵasy Tımýr Qosymbaev aıtty.

Ortalyq kommýnıkatsııalar qyzmetindegi brıfıngte ol kommýnaldyq jelilerdi jańǵyrtý apattar sanyn aıtarlyqtaı qysqartyp, ınjenerlik ınfraqurylymnyń jaı-kúıin tehnologııalyq deńgeıge deıin jetkizýge múmkindik beretinin aıtty. Osy oraıda komıtet basshysy «ábden tozyǵy jetken» tabıǵı monopolııalar sýbektileriniń sanyna toqtaldy.

- Elimizdiń 11 óńirinde jylýmen jabdyqtaý salasynda 22 monopolıstiń nemese sýbektilerdiń jalpy sanynyń úshten biriniń jylý jelileriniń tozýy 65 paıyzdan asady. Eń kóbi Shyǵys Qazaqstan oblysynda – 4-eý, al Aqmola, Qaraǵandy jáne pavlodar oblystarynda úsh-úshten sýbekt bar, - dedi Tımýr Qosymbaev.

Elektr energetıkasyna qatysty ahýal da osyndaı. 46 sýbektiniń 18-inde elektr jeliniń tozýy 70 paıyzdan asady. Al sýmen jabdyqtaý salasynda 26 sýbekt táýekel aımaǵynda tursa, sý burý salasynda 12 óńirdegi 24 sýbektiniń tozyǵy jetken. Jalpy, elimizde kommýnaldyq jelilerdiń jyl saıynǵy tabıǵı tozýy shamamen 2-3 paıyzdy nemese 4-5 shaqyrymdy quraıdy. 

- Munyń ústine qoldanystaǵy ınfraqurylymdardyń paıdalanǵanyna 50 jyldan asyp ketken. Infraqurylymnyń tozýymen tıimdi kúres júrgizý úshin ınjenerlik jeliler jóndeý jumystaryn aıtarlyqtaı ulǵaıtý qajet, - dedi komıtet basshysy. 

Buǵan deıin ótken jyldyń jylytý maýsymynda jylý jelilerinde – 53, sý jáne káriz jelilerinde 264 tehnologııalyq buzýshylyq tirkelgenin jazǵan edik.