Elimizdiń kolledjderi pedagog-assıstent daıyndaıdy

ASTANA. KAZINFORM – Bul týraly QR Oqý-aǵartý mınıstrliginiń baspasóz qyzmetinen habarlandy.

Oqý-aǵartý mınıstrligi erekshe bilim berý qajettilikteri bar balalar úshin teń múmkindikterdi qamtamasyz etý jáne mektepterde ınklıýzıvti bilim berý ortasyn qurý baǵytynda jumystar júrgizýde. Mundaǵy mańyzdy qadamnyń biri - pedagog-assıstent mamandaryn daıarlaý bolyp tabylady. 

Qazirgi ýaqytta psıhologııalyq-medıtsınalyq-pedagogıkalyq keńes berý esebinde (PMPK) erekshe bilim berýdi qajet etetin 203 myń bala bar. Olar 496 arnaıy bilim berý uıymdarynda oqıdy. Bilim berý uıymdarynda ınklıýzıvti orta qalyptastyrý úshin aıtarlyqtaı jumystar júrgizildi: erekshe bilim berý qajettilikteri bar balalar úshin balabaqshalardyń 69%-da, mektepterdiń 88%-da jáne kolledjderdiń 80%-da jaǵdaı jasalǵan. Mektepterde 1071 arnaıy jasaqtalǵan kabınet jumys isteıdi.

«Elimizdiń mektepterinde «pedagog-assıstent» laýazymy engizilip, mamandar sany bir jylda 1000-nan 2,5 myńǵa deıin artty. Pedagog-assıstent laýazymyn mektepke deıingi uıymdarda engizý múmkindigi qarastyrylýda. Erekshe bilim berý qajettilikteri bar balalarmen 9 myńnan astam arnaıy pedagog jumys isteıdi. Mamandarǵa degen qajettilikti eskere otyryp, kelesi oqý jylynan bastap elimizdiń kolledjderinde «pedagog-assıstentter» daıyndaý qolǵa alynýda», - deıdi Inklıýzıvti jáne arnaıy bilim berý departamentiniń dırektory Laýra Butabaeva.

«Oqý-aǵartý mınıstrligi erekshe bilim berý qajettilikteri bar balalar úshin bilim alý jaǵdaıyn jaqsartý jáne bilikti kadrlarmen qamtamasyz etý baǵytyndaǵy jumystardy jalǵastyrady»,-delingen habarlamada.

Osyǵan deıin Oqý-aǵartý mınıstrligine ata-analardan «Kúndelik» elektrondyq jýrnalynda jarnamalyq kontentke qatysty kóptegen shaǵym túskeni týraly jazdyq.